AHATÖ YEHOWA NA MU’AO NDRA’ODO

AHATÖ YEHOWA NA MU’AO NDRA’ODO

Ngenungenu Yeremia 3:49-57

Ba duho daroma li andre edöna ifa’ema khöda wa so ginötö fandröndröu Lowalangi na mu’ao/mangandrö ita khö-Nia. Ifaduhu’ö da’ö Yeremia ba ayati si 44 “No öbalugö Ndra’ugö lawuo, fa tebai isösö fangandrö.” Faudu ba da’ö, imane göi Yesaya olalöŵami zamabali ya’ita khö Lowalangi (Yes. 59:1-2).Ba daroma li andre, ifa’ema khöda hewisa ena’ö ahatö Yehowa na mu’ao ita. Hadia nifaluada ena’ö ibe’e mbörö dalinga-Nia Yehowa ba wangandröda? Si föföna, Ta’ide’ide’ö ita föna-Nia. Ba ayati si 49-51 ifatunö khöda Yeremia wa no mo’ala’ala manö hörönia, mowöiwöi daŵa hörönia föna Zo’aya ba wamaigimaigi Yeruzalema si no tobali adudula. Möi ia khö Lowalangi si fao taŵa hörö. Si ndruhunia, ira matua abua sibai me’e (laki-laki tidak identik dengan air mata). Idanö hörö zamaduhu’ö wa si tebai ita ba wanaögö fa’afökhö si lö mu’ila mufaehagö ba wehede. Fange’esi nilau Yeremia ya’ia da’ö fange’esi horönia ba horö mbanuania föna Yehowa. Ifaduhu’ö si fao taŵa hörö wa börö horöra wa tola adudu Yeruzalema. Ba wangidengide’öda ya’ita föna Zo’aya, tatunö zi ndruhu irege ahat ita khö-Nia.

Si dua, Mu’ao ita khö Nama, ba döi Yesu ba wa’abölö Geheha Ni’amoni’ö. Yesu zamahaö ya’ita wa fangandröda tafa’ema khö Lowalangi Ama. Takaoni Lowalangi andrö, “He Abba, He Ama”. Ya’ia Nama fondrege zolomasi ba sahatö sibai khöda. Hiza, ba wangandrö nifaehagöda khö Nama, tafa’ema da’ö ba döi Yesu Keriso. Imane Yesu ba Yohane 16:23b “Si ndruhundruhu niŵa’ögu khöi, na so ni’andrömi ba khö Nama, ba Ibe’e khömi, ba döi-Gu” (Fahela 14:13-14; 15:7, 16).

Aefa da’ö, ba we’aoda khö Nama, tebai na moroi ba wa’abölöda. Si ndruhunia, lö ta’ila hewisa wangandrö. Andrö tebai isuno ia niha na i‘ila mangandrö. Ifaduhu’ö khöda Faulo, imane “Ba si manö göi Geheha, itolo ita, me no ambo wa’abölöda. Hadia ni’andröda ena’ö, hewisa zi sökhi, ba lö’ö sa ta’ila; ba Ya’ia, Eheha andrö, I’iagö salahida, ba wangaröngarö si lö alua baeha” (Rm. 8:26). Mu’ao ita khö Nama, me Ya’ia gumbu howuhowu khöda. Ta’angaröfi li Ia ha ba döi Yesu Keriso, si no tobali sama’ema ba gotaluada khö Nama (1Tim. 2:5). Ba Eheha Ni’amoni’ö zamahaö ba sangabölö’ö ya’ita ba wangandrö si sökhi.

Si tölu, Tatöngöni wa’abölö Lowalangi, tenga falemba höröda ba mbusibusi dödöda. Ba ngenungenunia andre, no manö itahigö ia tödönia Yeremia ba horö ba ba wa’adudu Yeruzalema. Hiza, ba gafuriatania ifuli ifakhölö ia wa ha sambalö itolo ira Lowalangi, me Lowalangi andrö fondrege zabölö, ba si lö faröi khöra. Tenga busibusi dödö nitöngönida ba wangandrö; tanga Lowalangi si lö faröi ba si lö ambö fa’abölö sondrorogö ya’ita.

Ba daroma li andre, ifahaö ita ena’ö lö mamalömalö ita wangandrö. Ba ba wangandrö göi tafaudugö ia ba zomasi Nama, si mane niŵa’ö Yohane “Ba da’ö wa lö aiwö, si so khöda ba khö-Nia: na so ni’andröda, hadia ia, si faudu ba zomasi Ia, ba Ifondrondrongo khöda” (1Yoh. 5:14). Soli Deo Gloria! [Pdt. Mey Daman Lawolo]