ABERAHAMO

Turia Gaberahamo si tehöngö ba si lö irai taya ba dödö niha irugi ma’ökhö ya’ia hikayania me ibe’e sumange Lowalangi nononia Iza’aki. Ba da’ö ifaduhu’ö Yehowa Lowalangi wa “Awena sa U’ila, wa no sangata’ufi Lowalangi ndra’ugö [Aberahamo], me lö alimagö khöu nonou andrö, si ha sambua, ölulu khö-Gu” (1 Moze 22:12).

Si ndruhunia, na tahaogö ta’osisi’ö moroi ba wa mobörö, famati Gaberahamo andrö b no ibörögö me ikaoni ia Lowalangi moroi ba Guri – Galedaia (Heberai’o 11:8). Awu’a ia moroi ba da’ö isaŵa Harana. I’otarai Harana möi ia ba Gana’ana. Famatinia ba si tedou manö, he na itaria awuwu dania ba lala döröŵa wamatinia föna Zo’aya. Ifaduhu’ö sanura sura nifa’ohe’ö ba niha Heberai’o wa Aberahamo andrö irugi wa’amatenia ba mamati ia khö Lowalangi samabu’u khönia banua wa’ohahau dödö (11:13).

Ba hadia ha ama zamati Gaberahamo? Hadia no irai tarongo wa ya’ia andrö göi ba no samösa moroi ba gotalua zama’ele’ö? Si ndruhunia, ato ba gotaluada zi lö irai mamondrongo ma mombaso wa Aberahamo andrö ba no sama’ele’ö khö Lowalangi. Heza ifaduhu’ö da’ö Lowalangi? Ba huhuo Yehowa khö razo Abimelekhi, ifa’ema khönia Lowalangi wa Aberahamo andrö ba no sama’ele’ö. Imane Lowalangi “… noa sa sama’ele’ö ia [Aberahamo], ba akha mangandrö ia salahiu, ena’ö auri ndra’ugö …” (1 Moze 20:7).

Bosi zama’ele’ö (Heberai’o navi: niha si fahuhuo ba döi Lowalangi) nitandrösaigö khö Gaberahamo, faehu ia moroi ba zama’ele’ö tanö bö’ö si mane Yesaya, Yeremia, ma Danieli. Ya’ia tobali sama’ele’ö ba zi 3 (tölu) faosatö lala halöŵö:

Si föföna, Itema’ö daroma li Lowalangi. Fahuhuo khönia Lowalangi moroi ba zorugo (1 Moze 12:1-3). Ba gangilata, fahuhuo Yehowa khö Gaberahamo si mane nisura ba 1 Moze 15:1. Aefa da’ö, ba iforoma’ö göi Ia Lowalangi khönia (1 Moze 17:1). Irongo li Lowalangi ba itema’ö göi gamabu’ula li-Nia.

Si dua, Fahuhuo ia khö Lowalangi ba wangandrö. Ba 1 Moze 18:22-33, mangandrö Gaberahamo salahi mbanua Zodoma faoma Gomora. Si manö göi ba 1 Moze 20:7, Lowalangi zanguma’ö wa tola mangandrö Gaberahamo salahi Gabimelekhi. Ya’ia zi so ba gotalua niha khö Lowalangi.

Si tölu, Ifaduhu’ö Lowalangi ba niha. Aberahamo andre tekaoni ia tenga ha ba wanema ondröita Lowalangi. Tekaoni ia ena’ö ifaduhu’ö Lowalangi ba wa’aurinia. Ifazökhi naha wame’e sumange khö Zo’aya nahia ni’ila hörö niha si fasui wa ya’ia andrö samosumange Lowalangi.

Börö zi manö, sama’ele’ö tenga ha sama’ele’ö sanura sura (Yesaya irugi Maleakhi). Ato na sa zama’ele’ö si fahuhuo ba döi Lowalangi si lö manura sura, si mane Elia, Elisa, ba tanö bö’önia. Hiza, hikaya Gaberahamo andre, ifa’ema khöda wa tenga ha famati zi so khönia. Ifaduhu’ö ba mbuabuania wa ya’ia andrö enoni Lowalangi, nikaoni Zo’aya ba wamobörö amabu’ula li Lowalangi sirugi dania niha fefu, irugi ma’ökhö.

Ya tobali ita ndrela howuhowu Lowalangi!