“Tenga börö wa’abölöda wa tola tataögö fefu hadia ia ba guli danö andre, ha börö Keriso zangabölö’ö ya’ita irege tola te’efa’ö ita fefu ba da’ö. Inötö iada’a si so ya’ita tola tebulö, ba Lowalangi si no Umbu wa’abölö, lö irai tebulö”
Famobörö
Sura Waulo ba mbanua Wilifi andre isura me so ia ba gurunga. Heŵa’ae ba naha si basaki so ia, ba lö aetu i’oroma’ö wa’omuso dödönia, fangandrö saoha gölönia, ba fa’afaduhu dödönia khö Lowalangi. Ba daroma li andre ifa’ema Faulo wangandrö saoha gölönia ba mbanua Wilifi ba dolotolo andrö si no itema. Ba hiza ifa’ema göi Faulo wa fa’abölönia tenga börö mbuala nitemania andrö moroi ba zamati. Fa’abölönia börö Keriso same’e khönia fa’abölö. Moroi ba daroma li andre so 4(öfa) faosatö zinangea ta’osisi’ö:
Famotokhi
Fa’ahono dödö ba mbuala Lowalangi (ayat 10-11)
I’andrö saoha gölö Faulo ba dolotolo andrö nitemania, ba hiza ibe’e wa’aboto ba dödö wa tenga börö wa’ambö me no to’ölö Ia ba ahono dödönia ba zi no falukha ia. Da’a zi tobali tandra wa fa’omuso dödö Waulo tenga börö wa’afahöna zoguna, fa’asana ma fa lö fa’ambö hadia ia. Hiza’i, lö aetu ia wangandrö saoha gölö heŵa’ae na oya ba he göi mo’amböta. Me faomuso dödönia no si’oroi Lowalangi.
Asese niha samati göi ba ginötö andre, lö irai ahono dödönia ba zi so khönia, afu’afunia manö tana khönia guli danö. Itaria börö wa’oya gisö-isö dödö salio taya, salio laröi ba aekhu ba horö. Si ndruhunia, niha samati khö Yesu Keriso ihonoigö dödönia ba zi so khönia, tenga eluahania tebai mo’ohitö dödö ita, tebai ta’odödögö wohalöŵö. Hiza, böi mamalö ita tatema’ö si fao fa’omuso dödö hadia zi no i’amualagö Lowalangi ba lö aetu wanötönada wa lö iröi ita Lowalangi.
Böi aekhu ita ba horö börö ngawalö gisö-isö dödöda, irege lö te’o’aya döi Lowalangi ba wa’aurida. Na so gohitö dödöda ya tatou’ö ba danga Lowalangi, mohalöŵö ita ba faduhu dödöda wa I’amualagö khöda hadia ia ni’andröda, asala mamati ita ba si faudu ba zomasi Lowalangi.
Fa’abölö si’oroi Keriso (12-13)
Ba daroma li andre ifa’ema Faulo, wa falukha ia wa’abuso ba fa’olofo, falukha ia wa’anumana ba falukha ia göi wa’afahöna. Itohugö wanguma’ö wa “ulaŵa manö fefu, börö zangabölö’ö ya’o andrö”. Ulaŵa manö fefu tenga eluahania wa dozi samati lö tola lö itema fefu zomasi dödönia. Ba daroma li andre ifa’ema Faulo hewisa zamati ba wanema’ö fefu zalua ba wa’auri andre, na falukha wa’afahöna, na falukha wo’amböta, na falukha wa’omuso dödö, fa’abu dödö börö me Keriso zame’e fa’abölö.
Moroi ba daroma li andre ifaduhu’ö Faulo wa lö i’o’silö’ögö dolotolo si’oroi mbanua Wilifi. Da’a göi zi tobali tandra wa fa’omasi zamati si so ba Wilifi tenga ha ba mbewe; la’omas’ö soroi ba dödö; labe gokhötara, ba labe’e hadia zi so khöra (mengasihi melalui tindakan nyata) moroi ba dolotolo ba zoguna. Moroi ba da’ö zi tobali famaha’ö khöda wa famati ba fa’omasi tenga ha ba mbewe, so wa’ahakhö dödö si fao famalua ba wolo’ö ba ba wanolo awöda niha; so wa’atedou ba fagogohe tanga ba wanolo faoma fatambai, si föföna ba zi sara lala wamati khöda si falukha fa’ambö-ambö.
Salua khö Waulo andre asese alua ba zamati, falukha wa’abuso, fo’amböta, fökhö, faomuso dödö, fa’abasaki wangera-ngera, fa’ogömi-gömi dödö, ba tanö bö’önia, ba na tenga börö Yesu keriso zeme’e khöda fa’abölö ba lö tola tatema’ö fefu da’ö. Börö da’ö, na falukha ita zi manö, ondrasi Yesu ba wangandrö fa’abölö ba fa’ohahau dödö ba ngawalö noro dödöda. Ba ba niha si lö fa’abölö soroi Keriso ba aekhu ba wa’abu dödö, tekusi gera’era, ba tola manö aekhu ia ba wa’atekiko irege dania iröi Lowalangi ba tobali fawukasa ba wongambatö, ba tobali fango’aya döi Lowalangi.
Fefu mbuala nibe’eda ba no tobali tandra wamatida (14-18)
Ba daroma li andre ta’ila hewisa mbanua Wilifi ba wangai tana khöra ba wa nundreheni fo’amböta Waulo, lö tebulö ira ba wame’e dolotolo heŵa’ae na tenga sangalui dolotolo Waulo. Hiza, buala zamati andrö khö Waulo ba no ame’ela si sökhi, somasi Lowalangi.
Ba ginötö göi andre, ya’ita samati awö genoni, hadia no mowua wamati andrö si no ta’okhögö? Hadia no tafalua wa’omasi andrö khö ndra enoni ba ba zi sara lala wamati khöda? Si ndruhunia, fefu mbuala ma ame’ela nibe’eda ba no tobali tandra samaduhu’ö famatida. Na so game’ela dödöda, sia’a bua zinanöda, sia’a guriföda, si sambua ni’ofuluda, hadia no aoha gölöda ma abuatö dömbada na tabe’e? Iŵa’ö ba 2 Korindro 9:7b “si no aoha gölö fame’e, da’ö sa zomasi Lowalangi.”
Lö tebulö Lowalangi ba wa mönökhi soguna (19-20)
“Ba a’oi ibe’e khömi dania Lowalangigu fefu zoguna khömi”. Taroma li da’a tenga ba wanga’asogö fefu gisö’isö dödö. Nifa’ema Waulo ya’ia da’ö soguna, börö da’ö niha samati tekaoni ena’ö te’a’aro’ö ba wamati: mohalöŵö si’oroi dödö ba lö tebulö ba wanou’ö ba danga Lowalangi. Halöŵö side’ide na ifahowu’ö Lowalangi ba falukha wa’omuso dödö, ba heŵa’ae halöŵö sebua ba na lö ifahowu’ö Lowalangi ba lö tobali howuhowu. Börö da’ö lala halöŵö si no ifaduhusi tödö khöda Lowalangi, ta’ohalöwögöigö da’ö si faudu ba zomasi Lowalangi ena’ö solohe howuhowu ba wa’aurida ba wamönökhi soguna khöda.
Amarahuta
Ba daroma li andre, ifahaö ita wa fefu ngawalö zoguna khöda ba lö tebulö so Lowalangi umbu howuhowu khöda. Böi awuwu na falukha ita wa’atosasa; Keriso zame’e khöda fa’abölö ena’ö lö mangiwa dödöda ba wanörö ngawalö lala wekolida ba guli danö andre.
Na fahöna khöda, tekaoni ita ba wangandrö saoha gölö awö ba wanolo awöda. Fa’afahöna mbuala Lowalangi tenga ndrela ba wangerogöda Lowalangi. Hiza’i, ta’oguna’ö howu-howu da’ö tobali howu-howu ba dalifusö ba ba zi sara lala wamati khöda. Ya tobali ita howu-howu böi tobali howu.
Ba ngawalö hadia ia, amati wa so Lowalangi sondrorogö. Fa’aurida andre lö si’ogötö’ö alua si faudu ba zomasi ita. Hiza, lö tebulö Lowalangi ba wondrorogö ya’ita ba wa mönökhi ngawalö zoguna khöda. Mohalöŵö ba mangandrö da’ö zomasi Lowalangi.