Famobörö
Si ndruhunia, sama’ele’ö sanörö wondrege wa’afökhö ba we’amöinia enoni Zo’aya ya’ia Yeremia. Tekaoni ia me “iraono na” ia (1:6, 7). Ifatenge ia Yehowa ba wanegu horö zamatörö he göi ira ere ba Yerusalema sangerogö Lowalangi. Hiza, ba wangombakhania andrö, ba tenga samalalini era’era zamondrongo. Tumbu ba dödöra wa tandrosa, lahurufai ia, ba lafalua khönia zi lö sökhi: ibözi ia Fasuri ba ibe’e ba galo (20:2); tobali fama’iki wangombakhania (20:7-8); edöna labunu (26:8, 11); latibo’ö ba dögi si so taimba (38:6); lakuru ba gurunga barö danö (37:16). Fondrege wa’afökhö nitaögönia. Andrö ilau mangarö khö Yehowa (meratap/menangis), sogaoni ya’ia, si mane nisura ba 15:15-21.
Hiza, ba wangaröngarönia andrö, ba ifaduhu’ö föna Yehowa wa taroma li Lowalangi zi tobali fa’omuso dödönia ba zalua andrö khönia fefu, irege dania owuawua dödönia khö Yehowa. Hana wa tola tobali fa’omuso dödönia daroma li Lowalangi andrö?
Famotokhi
Si föföna, taroma li andrö tobali fa’omuso dödöda börö me ba daroma li andrö tasöndra wa’abölö ba lala döröŵada. Si ndruhunia, afökhö sibai nitörö Yeremia. Mu’ao ia khö Yehowa ena’ö ifaigi ia Lowalangi, börö zolohi ya’ia. Na lö ikaoni ia Yehowa, ba lö falukha ia wa’aila andrö moroi ba mbanuania. Hiza, ba wa’afökhö andrö, ba lö tölania ba wolaŵa. Ifaduhu’ö khöda wa fa’abölönia, tohare moroi ba daroma li Lowalangi. Imane “Falukhado daroma li khöU, ba no amaedola gögu.” Mo’amakhaita ba da’ö, ifaduhu’ö göi Yesu wa niha ba guli danö, “tenga ha ba gönia auri niha, ba ngawalö li fefu, si otarai mbawa Lowalangi, auri ia” (Mat. 4:4).
Fa’aurida si fasui fa’afökhö, ba idaludaluni ia taroma li ni’amoni’ö. Lö nifabu’u Lowalangi wa awai ba zi lö ara’ara noro dödöda. Nifabu’u-Nia khöda ya’ia da’ö soso Ia khöda, ibe’e khöda wa’abölö soroi daroma li-Nia. Börö zi manö, taroma li Lowalangi böi ta’osiwawöi. Tatanö ba dödöda, me baluseda ba fa’abölöda ia ero’ero inötö.
Si dua, ba daroma li tasöndra wozu wa’aurida. Imane Yeremia, “no töi-Mö mbörö wa motöi ya’odo, Ya’ugö Yehowa, Lowalangi ngahönö.” Ato niha sanofu, hadia manö guna wa ifazökhi ndra’odo Lowalangi? Hadia manö geluaha wa oya wamakao? Hadia wa ikaoni ndrao Yehowa wama’ema li-Nia ba niha sabe tandro? Si ndruhunia, lö latema’ö banua Yeremia. Ya’ia iraono si bohou ebua. Mo’amböta ia ba wa’atuatua. Lö onekhe fahuhuo. Labe’e mbörö du’ira niha ba huhuonia. Lö lafalua khönia gamaedola zatua, sangumaö “Mate zi sagötö, atua zi sandrohu, mangali si omnbu’ombu”. Si sökhi nifa’emania, ba lakusi wisora niha samondrongo. Hiza, ba daroma li Lowalangi so khönia wa’aboto ba dödö wa ya’ia andrö no tana khö Lowalangi, enoni Zo’aya. Heŵa’ae lö aolo dödö niha khönia, ba so Yehowa sokaoni ya’ia. Heŵa’ae ha ya’iaya’ia, ba so Lowalangi si lö faröi khönia.
Ha niha ita ba guli danö andre? To’ölö tasu’a ha niha ia zi samösa niha molo’ö fa’akayo, bosi, lakhömi, ba tanö bö’önia. Si ndruhunia, fefu da’ö ba lö tobali fanu’a si sökhi. Ya’ita no ihonogöi ha niha ita Lowalangi me Ya’ia zomböi ba sangorifi ya’ita. Ya’ita ono Lowalangi, si tobali soroiyomonia, si lö mamalö I’omasi’ö. Ituturu khöda lala ba isului gaheda ena’ö böi manendre (Sin. 119:105). Eluahania, fefu li soya ngawalö nirongorongoda, lö ifangiwa dödöda börö me so daroma li Lowalangi sangaro’ö tödöda khö Lowalangi, Amada solomasi.
Si tölu, ba daroma li tefa’ema khöda ena’ö böi aetu wanötöna börö me lö iböhöi ita Lowalangi. Ilau fatahi Yeremia khö Yehowa, “Hana wa lö’ö sa’ae mamalömalö wa’afökhö khögu ...” (18). Ifa’ema fefu nösi dödönia, sambua lö nibini’önia. Idunödunö ba wangandrönia hewisa wangosiwawöi niha ya’ia, fa’atebainia ba waloŵa samazuzu khönia, ba fa’oköli dödönia me no hulö nizuzu Yehowa ia ba gotalua mbanua si fatandro. Yeremia andre, lö iröi wama’ema li Lowalangi na lö oföna ua ifa’ema nösi dödönia khö Yehowa. Itaria manö niha, awuwu manö mane guro, lö fehede si sambua ba wame’e fangaboto ba dödö.
Ba watahisa Yeremia andrö, ba Itema li-Nia Yehowa, imane “Na öfuli’ö, ba ufuli utehe khöu wangondasi Ya’odo … Ba Ube’e ba’aba’a töla saro ndra’ugö föna niha andrö, ba na fasöndra ira khöu, ba tebai lalaŵa ndra’ugö, so sa’ae Ndra’odo ba ngaiu, ba wanolo ya’ugö ba ba wangorifi ya’ugö – iŵa’ö Yehowa. Ba U’efa’ö ndra’ugö ba danga zi lö sökhi ba ba gokhö zamakao” (19-21). Ba niŵa’ö Lowalangi andrö oroma wa tenga bua halöŵönia ba wamalalini era’era niha sato, ni’alui Yehowa. Si ndruhunia, ba da’ö ifahaö Yeremia ena’ö böi faröi (setia) ia ba halöŵö andrö. No anehe Yehowa moroi ba mböröta tekaoni ia, hewisa lualua wangainia halöŵö andrö: hadia so zanema’ö ma latimbagö ia? Ba zi 40 fakhe, ba lö tebulö faofao khönia Yehowa: fahuhuo ba ifakhoi ia Lowalangi. Hiza, lö aetu wanötönania börö me so Yehowa si fahuhuo (same’e taroma li) khönia. Taroma li Lowalangi no so khöda ma’afefu, dozi ita tola tabaso. Hadia faduhu dödöda ba da’ö?
Amarahuta
Ifaduhu’ö sanura sura Zinunö wa taroma li Lowalangi andrö ami sibai, ami moroi ba ŵe ŵani (119:103), tobali fangokafu dödö ba i‘atuatua’ö zambö tödö (19:8), i‘omusoi’ö dödöda ba ifehaga höröda (19:9). Taroma li Lowalangi ifa’ema ba tesura khöda, ena’ö tafondrondrongo, tabaso ba ta’angerönusi ba tafaluagö si fao famati. Taroma li zamokai tödöda, isului lala döröŵada, ifa’ema khöda wa’omasi Lowalangi. Börö zi manö, ha wa ahatö sibai khöda daroma li Zo’aya? Hadia nifatoutou dödöda bongi ma’ökhö – taroma li ma amuata nawöu niha? Ya itolo ita Lowalangi – Soli Deo Gloria! [Pdt. Mey Daman Lawolo]