I. Famobōrō
Ama/Ina, talifusō ni’omasi’ō…..
Famati niha Keriso tenga ha ba da’ō te’oroma’ō na so bakha ba gosali ilau manunō ba mangandrō. Famati siduhu andrō te’oroma’ō ba gamuatada bongi ba ma’ōkhō si te’ila ba niha fefu.
Ba daromali Lowalangi andre ma’ōkhō, ha wa omuso dodo Yohane meno tefaduhu’ō gamuata Gayo andrō ba khōndra enoni Zo’aya meno ifalua wanolo bakhōra andrō, ya’ia me ibe’e nahiara ba balazo soguna khōndra enoni andrō, he no niha bō’ō ira.
II. Famotokhi
Ba zura 3 Yohane 1:5-8 ba da’e te’ombakha’ō gamuata sino ifalua Gayo, ya’ia ba wamalua Sifaoma Manolo sitobali ila-ila gamuata niha samati sinangea khō Lowalangi.
Tōlu faosatō wanolo sinangea ba khō Lowalangi :
1. Fanolo Bōi Ebua Dōdō Zambuana (ay.5)
“He ya’ugō ni’omasi’ō! Satulō nilaumō ba dalifusō andrō, mendrua manō, me no niha bō’ō ira”.
Gayo i falua wanolo ba niha ni fotōi niha bō’ō (orang asing), tenga bōrō me mbambatō ba tenga gōi bōrō me sambua soi ma zui bōrō me niha so okhōta, ena’ō tola lasulōni khōnia wanolo andrō nifaluania, hiza i famaluania amuata wanolo andrō siduhu si’oroi dōdō saohagōlō.
Ila-ila niha samati khō Keriso ya’ia ba wamalua fanolo na lō fabō’ōsa dōdō, he ba niha si tosasa ba he niha bō’ō. Itaria ya’ita niha Keriso tafalua wanolo ha ba niha sangomasi’ō ya’ita. Taromali Lowalangi ba zi ma’ōkhō andre i fasugi ba dōdōda ba wamalua sifaoma manolo ba niha ha niha manō ia, ba da’ō dania te’ila’ō wamati da andrō na lō ebua dōdōda zambuana ba wamalua sifaoma manolo andrō sifao fa’ohahau dōdō.
Yak. 2 : 1, 9 imane :
“Ya’ami ira talifusōgu, bōi mi’ebua’ō dōdōmi zambuana, ba wamati andrō, khō Zo’aya lakhōmi andrō khōda, Yesu Keriso Ba na mi’ebua’ō dōdōmi zambuana, ba mamazōkhi horō ami, ba i faduhu’ō khōmi oroisa, wano sanawō ami”.
2. Fanolo Si Nangea Khō Lowalangi (ay.6)
“Samaduhu’ō fa’omasiu, ba zi so banua, ba sōkhi, na ōtolo ira, ba wofanō, si nangea ba khō Lowalangi”.
Sinangea khō Lowalangi eluahania bu’ala si sōkhi, simanō ni falua Gayo ba wanolo andrō tenga si lō ahori ma sahatō obou nibe’enia, hiza ibe’e wanolo andrō si sōkhi si nangea ba khō Lowalangi.
Ba wamalua fanolo andrō da ta be’e zi sōkhi ba siduhu moroi dōdō ba saohagōlō, bōi sifao fekōkō ma ba wangalui tōi ena’ō tesuno ita ba gotalua niha.
Tafalua wanolo andrō me da’ō zi nangea ba khō Lowalangi.
Heb. 13 : 16, imane :
Bōi mi olifugō ami, ba wanolo si numana, ba ba dolotolo andrō, somasi Lowalangi sa zumange si manō.
3. Fanolo Si Tobali Awō Ba Halōwō Lowalangi (ay.7-8)
“Bōrō sa dōi andrō, wa mofanō ira, ba lō lahalō hadia ia ba niha baero.
Andrō mo’ōmō ita, tatolo zi mane ya’ira andrō, ena’ō sanolo ba halōwō ita, ba zi duhu andrō”.
Tenga fufe niha tekaoni tobali enoni ba wama’ema turia somuso dōdō andrō, hiza i faduhu’ō Yohane khōda ba daromali andre wa sōkhi na tafalua wanolo, ena’ō sanolo ba halōwō ita, ba zi duhu andrō.
Sifaoma manolo bakha ba gosali ba he gōi ba gotalua niha fefu, na no tafalua zimanō hiza no Awō Ba Halōwō Lowalangi ita.
1 Kor. 3 : 9, imane :
Sanolo sa ndra’aga, ba halōwō, khō Lowalangi; nowi Lowalangi ami, tomosa khō Lowalangi.
III. Amarahuta
Ba wanōrō lala wa’auri ba wa’aduhu ba guli danō andre tenga bōrō me oya nōsi Zura Ni’amoni’ō sino tatanō ba dōdōda, hiza i ha wa’ebua fa’omasi sifaoma manolo nifaluada ba nawō ba he ba lala halōwō andrō khō Keriso meno Awō Ba Halōwō Lowalangi ita.
Lō gunania ta’ila wa’aduhu na lō ta’o’ō ba wa’aurida, ya tobali ita Gayo-Gayo (Gayus-Gayus) “sibohou” ba gotalua dalifusō, fabanuasa ba ba gosalida zamōsana.
Gal. 6 : 2, 10, imane :
“Faoma mi’onoro noro dōdō nawōmi, ba no mi’o’ō goroisa Keriso andrō.
Ba talau sa’ae zi sōkhi, meno bawania khōda, ba niha fefu, ba ofōna ba zi ha sara lala wamati awōda”.