Famobörö
Na nifotöi nikaoni ba nituyu, ba so göi zi lö tekaoni ba si lö tetuyu. Me ato zamaelungu ba gotalua zamati sanema sura Wetero andre, andrö ifahaö ira ba i‘abe’e’ö dödöra ha niha ira (identitas) föna Zo’aya. Lafaelungu ira niha satuatua ena’ö ba wamatira andrö, ba lafalua göi lala halöŵö si lö ni’oroi’ö Lowalangi. Aandrö ibe’e wa’aboto ba dödö Fetero wa ya’ira andrö dozi si no mamati khö Yesu Keriso, ba no nikaoni ba nituyu Lowalangi. Tekaoni börö me no ihönagö ituyu, ba te’aro’ö wanuyu andrö ba wa’afaduhusa tödö khö Lowalangi. Hadia zinangea ta’erönusi ba daroma li andre?
Famotokhi
Si föföna, Fogaoni Lowalangi ya’ita ba no Ifaogö zoguna ba wangorifi ya’ita ba wolo’ö khö-Nia (3-4). Fogaonida ba no si’otarai wa’abölö Lowalangi (kuasa ilahi), same’e khöda fa’abölö ba wa’aboto ba dödöda zogaoni ya’ita, ba wanöngöni amabu’ula li-Nia. Ifa’ema Fetero wa “fefu zoguna” ba wamati ba no I’amualagö Lowalangi. No ibe’e wa’abölö So’aya ena’ö tola tafalua zomasi Ia, irege aefa ita ba wa’atekiko ba ba wangisö andrö. Iada’a, hadia no aboto ba dödöda wa so wa’abölö ni’amualagö Lowalangi khöda ba wanörö lala wamati? Böi taŵaö tödöda, tebai uröi horö. Si sökhinia, tafareso hadia no ta’oguna’ö fakake nibe’e-Nia khöda ya’ita samati khö-Nia?
Si dua, Tetuyu ena’ö mowua (5-9). Imane Fetero, me no sa’ae I’amualagö Lowalangi khöda wa’abölö andrö, ba iada’e ta’odödögö wamalua si sökhi, ba wamaduhu’ö famatida. Danedanenia ya’ia wamati. Si so famati ba ifalua mbuabua si sökhi, so khönia wa’aboto ba dödö taroma li Lowalangi, itaha dödönia, lö areu/anau gölö, mangata’ufi Lowalangi (saleh), ba fa’omasi. Niha samati ba so wa’atedou ba mowua. Ifaduhu’ö Fetero wa niha si lö mowua ba wamati, ba no niha sau’a, si no abösi (buta dan picik), si no olifu fangehao andrö, fameta horö khö Yesu Keriso. Ituyu ita Lowalangi ena’ö ta’okhögö sa’ae mbuabua wamati, si tobali famaduhu’ö wa ya’ita andre no tehöli, ehao börö wameta horö andrö nifalua Zo’aya Yesu.
Si tölu, Fogaoni ba fanuyu Lowalangi zangaro’ö tödöda ba wogamö fa’auri si lö aetu (10-11). Halöŵöda ba wamati iada’a ya’ia da’ö tafaduhu’ö wamatida sagötö fekolida ba guli danö. No I’amualagö Lowalangi khöda wa’abölö ba wamalua buabua wamati, me no ikaoni ba ituyu ita. Niha samalua da’ö, ba no ifabu’u wa: Lö te’ala (tidak akan pernah tersandung) (10); ba lö te’ambösi lala ba mbanua Zo’aya andrö (hak penuh untuk memasuki Kerajaan kekal) (11). “Lö te’ala” ba li ndrawa Heleni ya’ia ptaio, eluahania tetutu gahe, lö baga wesindro (abua dambai). Sanandrösa ba nisura Wetero, lö te’ala andre ya’ia da’ö lö iröi Zo’aya dozi niha si no ituyu Lowalangi (tidak murtad). Aefa da’ö, “ba lö te’ambösi lala” ya’ia da’ö lala ba we’amöi bakha ba zi sambua naha (akses). Si ndruhundruhu wa takhamö mbanua zorugo andrö me no ituyu ita ba tafowua wamatida.
Amarahuta
Lö tebulö ta’andrö saoha gölö me no ikaoni ba ituyu ita Lowalangi tobali samati ba döi Yesu Keriso, me lö fefu tekaoni ba tetuyu niha ba da’ö. Mendrua manö, me no I’amualagö khöda wa’abölö ba wamati irege mowua ba mbuabua si sökhi. Ta’onorogö tödö da’ö, me no Ifabu’u khöda wa dozi samowua famatinia ba lö te’ala ba tebokai khönia lala ba wogamö banua zangorifi andrö. Ya owölö’ölö ba böi atage ita. So gurakhada fondrege zebua, si tebai i‘okhögö niha si lö mukaoni ba si lö mutuyu. Ya itolo ita Lowalangi.