Famobörö
Me no sa’ae aekhu niha ba horö, ba tobali sa’ae si fatuwu khö Lowalangi ira. Oya lala nifalua niha guli danö ena’ö tola fahuwu ira khö Lowalangi, ba lö manö lasöndra zo’ahonoa. Si mane ba nisura Waulo andre, ifatunö ba zamati si so ba mbanua Galatia wa tola atulö (benar) ita föna Lowalangi, ha börö wamati si ndruhundruhu khö Yesu Keriso. Ba daroma li andre, ifa’ema khöda Faulo zi tobali fangaboto ba dödöda hana wa ha ba wamati tola atulö ita khö Zo’aya.
Famotokhi
Si föföna, Lö satulö niha guli danö ba wolo’ö oroisa (15-16). Molo’ö nisura Waulo ba zura Roma 3:20, ibe’e goroisa andrö Lowalangi ba Ndraono Gizeraeli si tobali fangaboto ba dödö horö. Ba goroisa andrö ta’ila wa samalua horö ita föna Lowalangi. Hiza, nifotöi oroisa (taurat) so 3 (tölu) faosatö, ya’ia da’ö hukum sipil (oroisa ba wabanuasa), hukum seremonial (oroisa ba lala wasumangeta) ba hukum moral (oroisa ba wo’amuata föna Zo’aya ba föna niha). Ba zi tölu faosatö andrö fefu, ba lö si tola tafalua föna Lowalangi. Ha Yesu Keriso zi no mamalua da’ö fefu, irege sa’ae dania lö moguna khöda hukum sipil dan seremonial.
Amakhoita ba goroisa andrö zi tobali faguaguasa ba gotalua zamati. Niha Yehuda si no tobali Niha Keriso ba isao’ö bakha ba gotalua zamati soroi niha baero ena’ö la’o’ö wamalua oroisa nibe’e Lowalangi ba Ndraono Gizeraeli ena’ö tola la’okhögö wa’auri si lö aetu. Famahaö da’ö tobali famaelungu zamati. Andrö imane Faulo, samösa lö satulö niha guli danö ba wamalua oroisa: he niha Yehuda! Moguna goroisa andrö ena’ö tafaduhu’ö ba dödöda wa ya’ita andre lö fulitö tafalua zi lö omasi Lowalangi. Hadia lualuania? Da’ö nifatunö ba faosatö si dua.
Si dua, Ba wa’atulö Yesu Keriso tasöndra wa’auri. No aboto ba dödöda wa oroisa andrö moguna ia ba wame’e khöda fa’aboto ba dödö wa si so horö ita föna Zo’aya. Lualuania, lö niha samalua oroisa andrö ma’afefu. Ha samösa zamalua, ya’ia Yesu Keriso. Ba wolo’ö-Nia oroisa andrö tola te’orifi ita. Ha sambua zi tobali famakhaida ba wa’atulö Keriso, ya’ia wamati. Famati andrö zi tobali ono kusi wa’auri si lö aetu. Imane Yesu “Ha niha zamati, da’ö zi falukha fa’auri …, ba nitibo’ö zi lö mamati” (Mrk. 16:16). Ifatohu wanura ba zura Heberai’o “Ba na lö famati, ba tebai i‘omasi’ö niha Lowalangi: Sangondrasi Lowalangi ena’ö ba lö’ö sa tola lö mamati ia, so Lowalangi, ba ifoluo zangalui ya’ia andrö” (11:6).
Famati ya’ia da’ö faduhusa tödö khö Keriso. Ha Ya’ia zangorifi. Ha Ya’ia zalahida ba wamalua oroisa ma’afefu. Andrö ha khö-Nia tasöndra wa’auri börö me lö töi bö’ö nibe’e ba guli danö andre ena’ö tasöndra wa’auri si lö aetu, baero döi Yesu Keriso (Heb. 4:12). Nifotöi famati tenga buabua si sökhi. Na si ndruhu mamati ita, ba tafalua sa’ae zi faudu ba zomasi Lowalangi. Aefa da’ö, famati ha soguna ba zi samösamösa niha. Lö i‘orifi niha bö’ö famati zi samösa. Asese ifa’ema Yesu na ifadöhö wökhö niha, imane “famatimö zangorifi ya’ugö” tenga “famatinia.” Eluahania, tebai tasalahini nawöda ba wamati. Ha Yesu zalahida ba wamalua oroisa, ba wanaögö huku horö, ba wolohe ya’ita ba zorugo fa’ohahau dödö andrö (1 Tim. 2:5).
Si tölu, Murorogö Wa’auri ba khö Keriso Yesu. Ba ayati si 20, ifaduhu’ö Faulo wa niha samati khö Yesu Keriso, ba mu’o’ö wa’auri Yesu. Keriso Yesu sa’ae zauri ba mbotonia. Fefu mbuabua si sökhi, nifalua ba somasi Yesu, ba ifalua sa’ae niha samati sandrohu fekolinia ba guli danö. Famalua buabua si sökhi, moguna ba wangandrö saoha gölö khö Lowalangi me no i‘orifi ita, tandra wa no te’orifi ita ba niha fefu, ba tobali göi ndrela wamaduhu’öda ha niha Yesu Keriso andrö sangatulö’ö ya’ita. Imane Mahatma Gandhi “Aku suka Kristusmu. Aku tidak suka orang-orang Kristenmu. Orang-orang Kristenmu sangat berbeda dengan Kristusmu." Ba mbuabuada tafaduhu'ö wa ya'ita andre no atulö föna Zo'aya.
Amarahuta
Taroma li nisura Waulo andre, ifahaö ita ena’ö ta’osia’agö wamati ba wanöndra fa’auri si lö aetu ba döi Yesu Keriso. Famati si sökhi, ba ifowua mbuabua somasi Keriso, samolakhömi Lowalangi ba zorugo. Fefu niha samati, mu’onorogö tödö wanuriagö turia röfa si tobali turia fangorifi ba niha si faduhu tödö. – Soli Deo Gloria. [Pdt. Mey Daman Lawolo]