Famobõrõ
Me no aefa ifemanga niha sato sibai Yesu si lima ngahõnõ wa'ato ha lima ngawua roti si fao dua rozi gi'a, ba ihulõ wanguma’õ Yesu khõ ndra nifaha’õ-Nia, ena’õ la’ofõnai’õ we’amõi ba zi tambai idanõ. Ba gotalua da’õ gõi ba ifangawuli niha sato sibai andrõ Yesu ba mbanuara zamõsana ira. Aefa da’õ mõi Yesu si yawa ba hili, mangandrõ ha samõsa Ia.
Ba me no irugi bongi, ba no arõu ba hõrõ wamaigi nowo ndra nifaha’õ andrõ me no larugi dalu idanõ, ba ifalaoyo-loyo nowora andrõ bõrõ ndrulu nidanõ si fao fa’abõlõ nangi. Ba me arakhagõ itugi bõzi tõlu si hulõ wongi, ba i’ondrasi ira Yesu mowaõ-mawõi yawa ba dete nidanõ andrõ. Ba hiza irugi sibai fa’ata’u ndra nifaha’õ-Nia, me laŵa’õ “Bekhu”. Hiza ba gotalua da’õ, ba muhede khõra Yesu “Bõi mi’ata’ufi, mihonogõ manõ ami, ya’õdo da’e”. Ba me’i’ila da’õ Fetero, ba i’andrõ khõ Yesu ena’õ tola mõi ia gõi wangondrasi Yesu mowaõ-waõ yawa ba dete nidanõ idanõ. Ba me itehe khõnia Yesu ba mõi ia mowaõ-waõ ba dete nidanõ mangondrasi Yesu. Ba hiza me’arakhagõ ikhamõ gamaudu wetaro Yesu andrõ, ba me ifakhõlõ ia wamaigi nangi sabõlõ-bõlõ, ba ibõrõgõ ahõndrõ ia. Ba ilau mu’ao khõ Yesu imene ‘He Tua, orifido”. Ba i’anema’õ i’oro’õ ba ira’u dangania Yesu si fao fehede khõnia wanguma’õ “He sambõ famati, hana wamanufa dõdõu?” Ba meno aefa da’õ ba mõi ira yawa ba nowo, ba angi andrõ izumagõ tebato. Ba aefa da’õ mangalulu ira fõna Yesu yawa ba nowo andrõ, ba lamane “Si ndruhu wa Ono Lawalangi ndra’ugõ”.
Waõwaõ da’e tenga ha si tobali tandra fa’ahõli-hõli dõdõ, ba no mõi si tobali lala wamaduhu’õ ba khõda ha niha Yesu andrõ. Si tobali gõi famaha’õda ba wanõngõni lala wamati niha andre ba guli danõ awõ ba wanõngõni hewisa wa’ebua dõdõ Lowalangi si lõ irai tebulõ ba khõda ba gotalua wa’oriri dõdõ.
Famotokhi
1. Yesu Keriso andrõ: Samatõrõ Fefu Hadia Ia, ba Lowalangi Sangorifi
Si ndruhunia fa’ato’ele Yesu ba wo waõ-waõNia yawa ba dete nidano andrõ ba no si mõi lala wamaduhu’õ-Nia ba khõda wa no si ndruhu Lowalangi Ia. Ba lala wamaha’õ ba niha Yehuda asi ba idanõ sondrulu, ba no khala-khala fawukasa, fa’abõlõ wa’ogõmi ba fa’amate, famakiko si tebai itenawa fa’abõlõ niha. Ha Yehowa zangokhõgõ fa’abõlõ ba wanenaŵa fa’abõlõ ndrulu nidano awõ nasi (Yobi 9:8; Sinunõ 77:20).
Fowaõwaõ Yesu andrõ yawa ba dete nidanõ si mõi lala wama’ele’õ awõ ba wamaduhu’õ khõda wa sindruhu Lowalangi Ia. Me iŵa’õ “Ya’odo da’e” (ba li Heleni : “ἐγώ εἰμι = ego eimi”; ba li Indonesia : “Aku Ini”). Fagõlõ ia ba dõi Yehowa nifa’ele’õ khõ Moze yaŵa ba hili Zina’i, me imane: “Ya’odo manõ ndra’odo andre” (ba li Heberai’o “אֶהְיֶה אֲשֶׁר אֶהְיֶה = ehye asher ehye, ba li Indonesia : “Aku Adalah Aku”. Fahela: Sura II Moze 3:14). Famadahu’õ khõda wa no Ya’ia Yehowa Sombõi ba Samatõrõ õlia uli danõ ma’afefu.
Hewisa wa’ebua dõdõ ba fa’omasi Yesu khõ ndra nifaha’õ-Nia, irege lõ manõ irõi ira ba gotalua wa’abõlõ drulu nidano andrõ. Mõi I’ondrasi ira Yesu ba ginõtõ si faudu sibai, ba ginõtõ falukha ira gameta’uõ ba fa’abu dõdõ.
Ba da’e tola te’ombakha’õ khõda si ndruhunia, hewa’ae na lõ awõ si fahuwu ba si fao khõda ba wa’abu dõdõda ba lala wa’auri andre tou ba guli danõ, ba lõ manõ sa’atõ farõi Yehowa. No tohõna so manõ ia khõda, ba wanolo awõ ba wangomasi’õ ya’ita, ba lõ irai tewu’a.
2. Õsi Duho Wamati: Faduhusa Tõdõ ba Fa’ambõ Faduhusa tõdõ
Õsi duho wamati si ndruhu ya’ia da’õ fa’aro dõdõ si lõ irai tewu’aini. Me i’andrõ Fetero khõ Yesu ena’õ itehe Yesu tola mõi ia wangondrasi Yesu mowaõwaõ yaŵa ba dete nidanõ. No tandra wa famati sauri da’õ khõnia. No amaedola irõi khõnia nahia gabula dõdõ yaŵa ba nowo, ba mõi ia mangondrasi Yesu sangorifi.
Ba li nono niha fehede “Famati” tehalõ moroi ba wehede “Futi”. Futi tetandrosaigõ ia ba halõŵõ wangazõkhi omo ma zui ba halõŵõ wangehao gama-gama. Ena’õ tola aro ba lõ tegilo gamaondrata mbalõ geu, ba moguna mufofuti-futi, ena’õ aro ba fa’a. Moroi ba wehede da’õ ba te’owua wehede “Fati” (Kata Kerja). Eluahania ena’õ mo’arota, lõ faefa, faoma fakha’a ba dõla.
Famati si ndruhu tenga ha fa’aboto manõ ba dõdõ wa Yesu andrõ sangorifi, tenga gõi ha faduhusa manõ bakha ba dõdõ, ba hiza fa’aboto ba dõdõ awõ waduhusa tõdõ si no mu’okhõgõ; ifõnui ia amuata wa lõ fa’aiwõ dõdõ, wa lõ fangiwa dõdõ ba si fao fa’aro dõdõ ba fanõtõna khõ Yesu Keriso, itete ba wamalua somasi Yesu Keriso ba wa’uri. He na oya wamakao awõ gabula dõdõ, he na oya wanandraigõ, he na oya mbusi-mbusi dõdõ ba lõ manõ taya ba tewu’a wa’aro dõdõ ba wanõtõna khõ Yesu Keriso.
Ba waõ-waõ Wetero andre nibasoda, oroma khõda wa no hulõ saro famati sibai Wetero andre khõ Yesu me i’andrõ ena’õ mõi ia mangondrasi Yesu mowaõ-waõ yawa ba dete nidanõ. Hiza ta’ila me mõi ia i’ondrasi Yesu ba dete nidanõ, ba me arakhagõ irugi gamaudu zi so Yesu; ba i’anema’õ ahõndrõ ia, irege mu’ao ia khõ Yesu, imane “He Tua, o’rifido”! Si tobali fanofu khõda; hana wa i’anema’õ ahõndrõ Wetero ba wangondrasi Yesu? Ba Ayati 30 Itutunõ khõda ba da’e wa Fetero andre ba no ifakhõlõ ia wamaigi angi ba ikhamõ ia fa’ata’u. Da’e dandra khõda wa Fetero andre lõ nasa saro sibai wamatinia khõ Yesu ba ginõtõ da’õ. Andrõ iŵa’õ khõnia Yesu “He sambõ famati, hana wamanufa dõdõu?” Fehede “Sambõ Famati”, tenga da’õ geluahania “Lõ Famati”. Hiza bõrõ me ambõ aro dõdõ Wetero khõ Yesu me mowaõ-waõ ia yaŵa ba dete nidanõ ba no ikhamõ ia fangiwa dõdõ me ihole’õ mbawania wamaigi angi sabõlõ-bõlõ andrõ irege ikhamõ ia fa’ata’u.
Fangiwa dõdõ andrõ te’owua ia, tenga da’õ bõrõ me Lowangangi no farõi ia, ba hiza te’owua da’õ ba wa’auri bõrõ me no tatehegõ wa’abõlõ guli danõ andre fatewu ba wa’aurida, irege tetayaigõ ba dõdõda wanõtõna khõ Lowalangi.
3. Bua Wamati: Famaduhu’õ Si fao Famolakhõmi
Me no aefa i’oro’õ dangania khõnia Yesu, me no mõi ira yaŵa ba nowo. Ba fa’abõlõ nangi ba tebato. Lõ sa’ae fa’ata’u khõ ndra nifaha’õ Yesu. Salua ba dõdõra fa’ahõli-hõli dõdõ, si fao famaduhu’õ ba fangalulu ba famolakhõmi Lowalangi. Ba ayati 33 lamane “Duhu Ono Lowalangi Ndra’ugõ.”
Angi andrõ si mõi famakiko, ba no si mõi lala wamaduhu’õ khõ ndra nifaha’õ ena’õ aboto ba dõdõra lakhõmi ba fa’abõlõ Lowalangi ni’okhõgõ Yesu Keriso. Andrõ na itaria ikhamõ ita fanandraigõ, ba na lõ manõ irai tebulo wanõtõnada khõ Lowalangi irege tasõndra wanolo, ba no gõi si tobali lala khõda ena’õ anehe ba dõdõda wa’ebua Lowalangi andrõ, irege alua khõda wamaduhu’õ Tõi-Nia andrõ, ba wangalulu khõ-Nia ba ba wamolakhõmi Ya’ia.
Famatõfa
Waõ-waõ da’e ifaha’õ ita, ena’õ:
1. Bõi tebulõ faduhu dõdõda khõ Yesu Keriso
2. Bõi tebulõ dõdõda khõ Yesus Keriso
3. Bõi tebulõ khõ-Nia manõ mangandrõ tolo ita
4. Bõi tebulõ ita ba wanuno ba ba wamolakhomi Lawalangi ba wa’aurida.