Famobörö
Nifotöi niha samati, tenga ha oroma ia na owölö’ölö möi ba gosali ma ba gorahua zamati. Samati khö Yesu Keriso, tenga ha ba döi, tefaduhu’ö göi ba mbuabua bongi ma’ökhö, ba lala halöŵö, ba wehede, ba ba wetaro ba wabanuasa, ba wa’atalifusöta, ba tanö bö’önia. Ya’ita samati khö Yesu Keriso (enoni he göi niha samati ma’afefu), ta’onorogö tödö ena’ö tefaduhu’ö ba niha sangila wa ya’ita no tana khö Zo’aya. Fo’ömöda ena’ö tefolakhömi Lowalangi ba wa’aurida sandrohu fekolida ba guli danö.
Famotokhi
Si föföna, Tefolakhömi Lowalangi ba wa’aurida si faudu ba wamahaö si ndruhu (1-5). Ifa’ohe’ö zurania andre khö Tito Faulo ena’ö i‘amenesi zamati si so ba mbanua Gereta hewisa ba wo’amuata föna Lowalangi he göi ba gotalua wabanuasa. Fama’ohe’ö sura andre, mufodanedane ba wa’auri niha samati ba Gereta, sawena mamalalini era’era. Ya’ira andre alio tegilo ba wamahaö selungu soroi ba zalaŵa fangerangera, sondrörö ya’ira ba huhuo si lö boto, ba samowöhö niha ena’ö laboto ira (1:10). Buabuara andrö, ba no ifaduhu’ö sama’ele’ö (pujangga) ba mbanuara wa “Sofaya manö Ndrawa Gereta andrö, utu ndru’u safaito, sedöna manö mangamanga lö halöŵö” (1:12). Börö zi manö, ifarou Faulo zamati si so ba Gereta, ena’ö latöngöni ba lafalua wo’amuata si sökhi samolakhömi Lowalangi.
Famolakhömi Lowalangi andrö mufodanedane ia ba wamahaö satulö, me ba wamahaö satulö andrö tumbu mbuabua si sökhi. Fo’ömö Dito ba wamahaö, ba wamalua, ba wamaduhu’ö famahö satulö ba zamati si so ba Gereta. Ba da’ö ifa’ema Faulo zi tobali danedane wamahaö: atulö ba wamahaö (ajaran yang benar), ifowua mbuabua satulö, ba tefolakhömi Lowalangi. Si tölu faosatö da’ö zi tobali famareso ero’ero famahaö.
Itohugö Faulo wa famahaö satulö andrö, oroma ba mbuabua. No izarazara Faulo: buabua zatua ira matua, satua ira alawe, ira alawe sawuyuwuyu, ba iraono matua si hino döla, ba sawuyu. Fefu mbosi da’ö, ba mutöngöni wamahaö satulö ena’ö tobali danedane ba wamalua buabua satulö.
Si dua, Tefolakhömi Lowalangi ba wa’aurida si tobali dumaduma föna zato (6-8). I’amenesi Dito ena’ö ifahaö zi hino döla ena’ö atuatua. Fehede atuatua (Indo: menguasai diri) zabölö ifa’ema Faulo. Fa’auri Niha Keriso, tenga zi lö goigoi. Tekaoni ita ba wamati ena’ö tola tataha dödöda awö gohitö si lö eluaha. Ba wamalua da’ö, ifarou Faulo Dito andre, ena’ö tobali dumaduma ba niha fefu: ba mbuabua, ba wamahaö, böi fabaya zi lö göna, mo’adu, ba wehede irege dania aila zi fa’udu khönia (7-8).
Ba nifa’ema Waulo andre, tobali sa’ae dumaduma ni’ila hörö Dito ba gotalua zamati ba wamalua si sökhi: famahaö ba he göi ba mbuabua. Tenga ha ifarou niha ba wamalua soadu. Ya’ia samösa zi tobali dumaduma, sondrönia’ö sato ba samaduhu’ö satulö andrö. Manandrösa göi da’ö ma’afefu ba niha satua, ira alawe satua ba iraono alawe sawuyuwuyu ba he göi khö ndraono matua si hino döla ba he göi sawuyu. Ya’ira fefu zi tobali dumaduma ba wamalua satulö ba gotalua mbanua Gereta. Ya’ira Niha Keriso samaduhu’ö wo’amuata si sökhi ba guli danö.
Si tölu, Tefolakhömi Lowalangi ba wa’aurida samaduhu’ö turia somuso dödö (9-10). Ba ayati 9-10, ifarou zawuyu (budak) ena’ö so wolo’ö, böi mamadaö, böi managö, ena’ö teturiagö lala Lowalangi, sangorifi ya’ita. Sawuyu ba ginötö Roma, ba tenga niha nifotöi sawuyu. Tola manö ifalua khöra hadia ia sokhö ya’ira. Hiza, bakha ba da’ö ifa’ema Faulo ena’ö manö so wolo’ö ba böi mamadaö. Hana? Ba da’ö dania ndrela wanuariagö fa’omasi Lowalangi si no latema ba khö Keriso Yesu. Fa’aurira andrö dania zamaduhu’ö hewisa ia Lowalangi, safönu fa’omasi. Samuza tö, tekaoni ita ena’ö tefolakhömi Lowalangi ba wa’aurida.
Amarahuta
Ba zura Waulo andre khö Dito, ifahaö ita wa ya’ita no tefahaö ba lö manö mamalö mufahaö ba wamahaö satulö. Niha si lö manema’ö famahaö satulö, ba lö atulö göi ba mbuabua. Niha samaelungu famahaö, ba elungu göi ba mbuabua, ba lö tefolakhömi Lowalangi ba da’ö. Tobali noro dödöda ma’afefu, ena’ö fefu wamahaö satulö, tola tafaduhu’ö da’ö ba mbuabua si’ero ma’ökhö, irege dania tefolakhömi Lowalangi ba lala wa’aurida. Ya itolo ita Lowalangi.
Soli Deo Gloria