Famobörö
Ba ngaluo ma’ökhö no 161 fakhe sa’ae me no irugi Danö Niha andre khöda taroma li Lowalangi (27 September 1865 – 27 September 2026). Ba zanandrösa ba huhuo ma’ökhö, na tafahela wa’auri Nono Niha fatua lö na taroma li Lowalangi, ba no sanötöna khö nadu ita. Hadia ia zalua khöda, ba ta’ohe föna nadu, ifasao ere fefu ngaröngarö dödöda. Hiza, me no sa’ae irugi ita haga duria somuso dödö andrö, ba fefu waöwaö wo’ere ba nadu andrö, ba tebulö’ö. Hadia ia sa’ae wakaosada, tasao’ö föna Lowalangi, si mane nifalua Dawido andre, wa lö aefa’aefa hörönia khö Yehowa. Hadia zinangea ta’erönusi ba Zinunö Dawido andre?
Famotokhi
Si föföna, Na lö tebulö höröda khö Yehowa ba lö tebulö göi ita wa khö-Nia tasöndra wanolo ba fangorifi (15-17). Ifaduhu’ö Dawido wa no alau gahenia ba gu’ö, sabua fanotogö. Tebai itotogö na molo’ö fa’abölönia. Börö zi manö, mu’ao ia khö Yehowa, i’andrö wanolo Lowalangi. Ba da’ö ifa’ema Dawido wa niha samati lö zi lö göna ia abula dödö sabua ma’ifu. Aefa da’ö, ifa’ema göi wa so ndrohundrohu wa’abölö niha ba wanolo ya’ita. Hiza, si tebai ikhamö niha, ba ta’angaröfi li Yehowa. Buku Zinunö No. 13 ayati si dua, imane “Na tebai itolo niha, angaröfi li Yehowa, Haleluya! Haleluya!” Taroma li andre zamahaö ya’ita wa niha samalemba hörönia khö Yehowa, ba lö aiŵö, lö ata’u na so noro dödö ma fanandraigö me so Lowalangi si lö mamalö manolo ya’ia (17).
Si dua, na no falemba höröda khö Yehowa, ba talulu wa’aurida khö-Nia si fao fangidengide’ö (18-19). Anehe Dawido wa Lowalangi ba zorugo, lö zi lö ahori I’ila gosilöŵa niha ba guli danö; lö si tobini föna-Nia. Andrö mu’ao Dawido ena’ö Ifaigi wa’anumanania ba fa’abu dödönia Lowalangi. No oya sa’ae zi fatiu tödö khönia. Baero da’ö, ba we’aonia andrö, ba ifaogö wangidengide’ö ya’ia föna Zo’aya, ya’ia ba wangandrö ena’ö I’efa’ö Lowalangi göi fefu horönia (18). Boto wangidengide’ö soroi zamati ya’ia wamaduhu’ö föna Lowalangi wa ya’ita andre sebua horö. Niha sangidengide’ö ya’ia, ba da’ö dania ni’ebua’ö.
Si tölu, na lö tebulö höröda khö Lowalangi ba tasöndra wa’ohahau dödö ba fanötöna saro (20-22). Ba ayati si 20 imane “Rorogö nosogu ba orifi ndra’o, böi be’e aila ndra’o, me udönadöna khöU.” Fehede “me udönadöna khöU” si ndruhunia tehalö moroi ba li Heberai’o chacah, (Indo: berlindung) “ubini’ödo khöU” si mane ono manu si möi barö gafi ninania. Na lö falemba höröda khö Zo’aya, ba lö ta’ila tabini’ö ita barö gafi-Nia. Börö zi manö, famatida tenga börö wa lö ata’u ita. Ata’u ita na lö sanolo ya’ita. Ata’u ita na lö nahiada ba wamini’ö ya’ita barö gafi Lowalangi.
Amarahuta
Lowalangi andrö ahatö ia ba niha sahatö khö-Nia. Lö aiŵö, ba lö ata’u niha si no so barö gafi Yehowa. Andrö böi tebulö manötöna ba falemba höröda khö Zo’aya ba lala wa’aurida ba guli danö. Ya itolo ita Lowalangi!
Soli Deo Gloria