LÖ FARÖI MANGOMASI’Ö BA MOLO’Ö YESU

LÖ FARÖI MANGOMASI’Ö BA MOLO’Ö YESU

(MENGASIHI DAN MENGIKUT YESUS DENGAN SETIA)

Yohane 21:15-19

Me no aefa manga Yesu awö nifahaö-Nia ba zinga mbaẇa Diberia, ba fahuhuo Ia khö Wetero. Huhuo-Nia andre itandrösaigö khö Wetero (secara pribadi), ba fagöna göi ba nifahaö-Nia tanö bö’ö mendrua manö khöda mane ma’ökhö. Ba huhuo Yesu andre, ifatunö khöda hewisa niha si lö faröi ba wangomasi’ö awö wolo’ö Yesu. Hewisa niha sangomasi’ö ba solo’ö Yesu Keriso?

Si föföna, Ifalua wangesa dödö ba mbuabua sangerogö Lowalangi. Me no maoso Yesu Keriso, ba lö sa’ae faofao Ia khö ndra nifahaö-Nia ero’ero inötö. Ha ba zi fasamuza iforoma’ö Ia khöra. Börö da’ö, tumbu ba dödö ndra nifahaö wangawuli furi ba halöwöra si no numalö. Ba ayati 1-14, idönia’ö ndra nifahaö Yesu, Fetero, fandriala ba mbaẇa Diberia. Börö me Fetero andre zebuabua ba gotalua ndra nifahaö (no mangowalu – Mat. 8:14), ba khönia fahuhuo Yesu. Mendrua manö, Fetero andre zanga’onga’oi khö Yesu wa oföna mate ia moroi khö Yesu. Ba me no lara’u Yesu, ba ata’u ia wamaduhu’ö wa ya’ia andrö sinenge Yesu. I’ositengagö Yesu, me dölu kali. Da’ö golalöẇa Wetero, inönö na me idönia’ö ndra nifahaö tanö bö’ö mangawuli furi ba halöẇö si no laröi.

Ba huhuo Yesu andrö, itegu Wetero, ena’ö mangesa dödönia, ba lö sa’ae itohugö mbuabuania sangerogö Yesu Keriso. Fanegu-Nia Wetero, ya’ia da’ö ba wanofu-Nia si tölu kali, me imane: “He Simoni, ono Yohane, hadia, abölö omasi’ö ndra’o, moroi ba wa’omasi da’e ndra’o?” Fanofu Yesu Keriso andre zamareso tödö Wetero side’ide (hunö dödönia); tenga ha fanema saliolio, li soroi hunö dödö sohauhau. Ba da’e i‘osindruhugö wamareso tödö Wetero, hadia zebua ba dödönia? Hadia Yesu Keriso ma halöẇönia, fandriala? Ifaduhu’ö Fetero wa anehe Yesu Keriso hewisa wa’omasinia Ia. Börö zi manö, fanofu Yesu Keriso andre, tobali fanofu-Nia khöda ma’ökhö: Hadia abölö ta’omasi’ö Yesu Keriso moroi ba wa’omasida zoroiyomoda (fo’omoda ba iraonoda), halöẇöda, fakada ba tanö bö’önia? Na so ni’omasi’öda sitöra moroi wa’omasida Keriso, ba no sangerogö Lowalangi ita. Tebai ebua ba dödöda nösi guli danö, moroi wa’omasida Keriso na no tobali tana khö Keriso ita. Hiza, na no ta’ositengagö Ia barö ginötö si no tatalu’i, ba talau mangesa föna Lowalangi, ena’ö ihakhösi tödö ita ba wanohugö fekoli ba guli danö. Fangesa zamati ero’ero inötö, tenga ha ba zi samuza börö me asese ta’olifugö Lowalangi ba wa’aurida. Ba wangesada tafaduhu’ö wa ta’omasi’ö Ia, ta’andrö wa’ebolo dödö ni’omasi’öda ba wangandrö ba fangalulu. Niha sangomasi’ö Yesu Keriso moroi ba danö bö’ö ba no isöndra mbanua wa’ohahau dödö si tebai mube’e ba niha guli danö si lö faduhu tödö khö Nono Lowalangi andrö.

Si dua, Ilului wangai halöẇö Zo’aya. Ba wanofu Keriso andrö, ba imane Fetero wanema “E Tua, ö’ila, omasido ndra’ugö.” Fozu wa’omasinia andre ena’ö oroma si tobali tandra. Da’ö mbörö wa imane khönia Yesu “Kubaloi mbiribirigu” (15, 16, 17). Eluaha niẇa’ö Yesu, na si ndruhu ö’omasi’ö ndra’o Fetero, halöwögöigö halöẇö niẇa’ö-Gu khöu, ba wokubaloi biribiri-Gu. Ibe’e noro dödö Wetero awö ndra nifahaö Yesu tanö bö’ö, ena’ö möi ira tobali kubalo mbiribiri Zo’aya ya’ita Yesu Keriso.

Imane Yesu, “Kubaloi mbiribirigu.” So zinangea ta’anehesi ba niẇa’ö-Nia andre, ya’ia da’ö biribiri nikubaloi Wetero awö nifahaö Yesu tanö bö’ö, ya’ia da’ö biribiri khö Yesu (domba milik Yesus), tenga biribiri khö ndra Fetero. Sökhi aboto ba dödöda wa warga jemaat nikubaloi ba zi sambawa organisasi gereja, no biribiri khö Yesu Keriso da’ö. Me Yesu zokhö biribiri andrö, ba böi ta’osiwawöi, ma zui tafeda’uda’u ena’ö la’ata’ufi ita. Ya’ita enoni ha tohutohu danga-Nia ba wokubaloi tana khö-Nia andrö, tenga ba wamalua khöra ösi dödö ma bakhubakhu dödöda. Ifa’ema göi Fetero ba zurania, imane wanguma’ö:

Ba li Nono Niha imane:

U’andrö sibai ena’ö mikubaloi mbiribiri si no Itou’ö ba dangami Lowalangi. mikubaloi ira si fao fa’omuso dödö si faudu ba zomasi Lowalangi, ba böi moroi ba wa’abua gölö. Böi göi milau da’ö ha ba wangalui luo (hare), ena’ö me si ndruhundruhu omasi ami möi enoni. Böi si mane samatörö ami (penguasa) ba khöra si no mufaduhusi tödö khömi, ena’ö tobali dumaduma ami khöra. Ba ba ginötö we’aso Gubalo Sebua andrö dania, ba mitema dakula solakhömi andrö si tebai ahoe (layu) (1 Fet. 4:2-4).

Ba wokubaloi biribiri Zo’aya andrö, imane khö Wetero “Kubaloi nono mbiribirigu” (15); “Kubaloi mbiribirigu” (16, 17). Ba bahasa Yunani, so dombua zinangea ifa’ema ba niẇa’ö-Nia andre, Yesu: Be’e gö nono mbiribirigu (15) ba örorogö mbiribirigu [ma’afefu] (16-17). Ba wokubaloi biribiri Lowalangi, talulu mboto, awö ginötöda ba wame’e gö nono awö ba wondrorogö biribiri andrö ba zi no ibe’e noro dödöda. Na si ndruhu ta’omasi’ö ba ta’o’ö Ia, ba ta’omasi’ö mbiribiri nibe’e-Nia khöda, takubaloi, tafahaöi ira ba daroma li Lowalangi si tobali ö fangorifi.

Sanandrösa khöda samati, ena’ö göi ta’anehesi ndra gubalo si no ifataro Lowalangi ba gotaluada. So manö gubalo si lö mangohalöẇögöigö halöẇönia, ma sareu, mendru manö na sangosipade ya’ia föna mbiribiri. Kubalo si manö, ba itema luonia dania khö Gubalo Sebua andrö. Ya’atuatua ita dozi nikubaloi, ena’ö ba wokubaloi ndra kubalo andrö, falukha ita khö Yesu Keriso. Na so gubalo si lö mamalukhaisi ya’ita khö Yesu Keriso, ba tenga kubalo nituyu Lowalangi zi manö; samaelungu samati, tohutohu danga gafökha!