Famobörö
Ama/Ina ba talifusö fefu ni'omasi'ö ba döi Zo'aya ya'ita Yesu Keriso. Tasuno Lowalangi ba ta'andrö saohagölö wa'omasi-Nia khöda zamösana ita, irugi ba ngaluo andre ma'ökhö, no tola takhamö mböröta Migu ba mbawa si walu ba ndröfi 2026 Andre.
Töi migu khöda ba ngaluo andre ma'ökhö: Migu IX Furi Trinitatis, eluahania no sa'ae siwa hari Migu no itolo Ita Lowalangi ba ndröfi 2026 da'a me no aefa ginötö wanörö tödö Fanema Eeheha Ni'amoni'ö ba ginötö si no numalö.
Taroma Li Lowalangi sitobali börö huhuo sebua khöda ba ngaluo andre ma'ökhö molo'ö zi no mufa'anö ba perikopen gereja AFY tehalö moroi ba Zura *Yosua 21:43-45*, tuhonia ya'ia da'ö *Ifalua fefu Lowalangi zi no ifabu'u (Semua Janji Tuhan Digenapi).*
Ama/Ina ba talifusö fefu ni'omasi'ö ba döi Zo'aya ya'ita Yesu Keriso, faduhu dödögu wa ba guli danö andre no irai falukha Ita niha sambö meme'e ba dödönia hadia ia zi no irai ifabu'u he khöda ya'ita niha gulidanö ba mendua manö khö Lowalangi ba Zorugo. Amaedolania mena'ö, Ira amada si so ba faka, simane Ira Presiden, Gubernur, Bupati, ira DPR ma tanö bö'ö nia nasa. Ba ginötö kampanye ira, ba oya sibai rou-rou dödö ma zazi nifa'emara ba nono wobanuasa ena'ö tola tafili ira ba tola mudadao ira ba jabatan tertentu, hizai i me no tefili ira, ba tola manö lö ba dödöra hadia ia zi no irai lafabu'u, ma tola manö na'i la'olifugö. He tafalala wamasugi khöra, ba lö ba dödöra, oya manö alasan labe'e khöda ena'ö böi sa'ae itörö tödö da zazira andrö.
Ama/Ina ba talifusö ni'omasi'ö ba döi Zo'aya, ba ngaluo andre ma'ökhö, ibotokhi khöda Taromali Lowalangi wa hewa'ae itaria olifu niha gulidanö zazira ma amabu'ula li ra ba ginötö andre, ba hiza i Lowalangi moroi ba Zorugo lö irai i'olifugö hadia zi no ifabu'u ba mbanua-Nia, ha sambalö wa ifalua irugi ginötö si no ihonogöi.
Famotokhi
Taroma Li Lowalangi nibasoda ba ngaluo andre ma'ökhö, sanura ya'ia, ya'ia daö Yosua, samösa enoni nituyu Lowalangi me no aefa Moze tobali sanohugö ba wondröniaö iraono Gizaraeli ba wondrugi tanö amabu'ula li Lowalangi khö Gaberahamo ya'ia da'ö tanö Gana'ana. Secara umum, struktur zura Yosua andre mubagi tobali 3 (tölu) faosatö:
1. Faza 1-12 (Fasuwöta ndraono Gizera'eli ba wolawa niha baero si so ba danö Gana'ana, irege manaro'o Ira ba danö andrö)
2. Faza 13-21 (Fombagi tanö Kana'ana si no tanö Amabu'ula Li Lowalangi khö Gaberahamo ba ndra'ono Gizera'eli si-12 soi)
3. Faza 22-24 (Angahorita ba amakhoita safuria nifa'ema Yosua ba ndraono Gizera'eli).
Moroi ba struktur zura Yosua si 3 (tölu) faosatö da'a, aboto ba dödöda wa sura Yosua 21:43-45 da'e, isura ia Yosua me no sa'ae manaro'o (tinggal menetap) ndraono Gizera'eli ba danö Kana'ana, ba no göi ahori lafabagi khöra danö Kana'ana andrö ba 12 soi ndraono Gizera'eli. Me no aefa mufabagi danö Gana'ana andrö ba ibe'e wa'aro dödö ma fawu'usa Li Lowalangi ba ndraono Gizera'eli ena'ö aro Ira ba wamati.
Yosua 21:43-45 andre no sambua fa'omuso dödö ba famaduhu'ö wemöna ndraono Gizeraeli, wa hasambalö Ifalua Lowalangi zi no ifabu'u ba zamati khönia. Hewa'ae no 470 fakhe labaloi iraono Gizera'eli ena'ö latema'ö gamabu'ula Li Lowalangi andrö, lataögö wa'afökhö ba danö Miserayi, ba lö manö olifu Lowalangi Ira. Ibee khöra wa'omuso dödö Lowalangi ba ifabu'u khöra wa lö tebulö ia ba wondrorogö ya'ira.
Ama/Ina ba talifusö ni'omasi'ö ba döi Zo'aya, ba daromali nifa'ema khöda ba ngaluo Andre ma'ökhö, ibotokhi ba dödöda wa so 3 (tölu) faosatö zi lö tola lö tatöngöni ya'ita samati irugi ba ngaluo andre maökhö, enaö so khöda wa'afaduhu dödö wa lö tola lö'ö Ifalua fefu zi no irai ifabu'u Lowalangi ba zamati khönia, yaia daö:
Siföföna, amabu'ula li Lowalangi tola i'amualagö ba zamati molo'ö inötö si no ihonogöi (Ayati 43).
Itehegö Lowalangi ba ndraono Gizera'eli ena'ö tola manaro'o ira ba danö Gana'ana, börö me no irugi inötö nihonogöi Lowalangi khöra. Hewa'ae no ara ginötö labase'ö iraono Gizera'eli ba lö manö irai i'olifugö ira Lowalangi.
Ba ginötö da'e, asese manö khöda tasu'a wa'omasi Lowalangi andrö molo'ö somasi Ita. Na mangandrö ita na so gabula dödöda, ba ambakha no alio tatema ba wa'alio ni'andröda andrö, bahkan tola manö na'i fatahi Ita khö Lowalangi na lö manö tatema hadia ni'andröda andrö. Lowalangi moroi ba Zorugo, i'ila sibai hadia zinangea moguna khöda, i'ila ginötö hawa'ara tola i'amualagö gangandröwada. Böi ta faomagö ginötöda ba ginötö Lowalangi, börö me fefu hadia ia zi so ba gulidanö andre ba Ya'ia zamatörö ba Ya'ia zangamualagö, ya'ita niha gulidanö ha nifazökhi-Nia.
Sidua, Na no irugi inötö nihonogöi-Nia Lowalangi wangamualagö fawu'usa li-Nia ba zamati khö-Nia, ba lö sitola manimbagö (Ayati 44).
Me no I'amualagö Lowalangi danö Gana'ana andrö ba ndraono Gizera'eli, ba lö ilulu Ira. Lö itehe te'ala ira Lowalangi moroi ba ngawalö soi bö'ö fefu si no oföna mowenua ba danö Gana'ana andrö. He wa'ae na abu sibai dödö Yosua ba iraono Gizera'eli me la'ila niha si toröi ba mbanua andrö, ba börö me no inötö nitehe Lowalangi khöra, ba falukha Ita wemöna.
Simanö göi Ita ba ginötö iada'e Ama/Ina, böi manö so khöda wa'aombö dödö khö Lowalangi. Hewa'ae tebai na dali ba wa'aniha ba na khö Lowalangi lö si tebai. Lö ambö Danga Lowalangi ba wanolo, mendua manö ba wondorogö dozi samati khö-Nia.
Sitölu, Fefu hadia ia zi no ihonogöi Lowalangi ba lö irai tebulö (Ayati 45). Taroma Li Lowalangi ba ayati 45 Andre, ba no tobali fa'aro dödö ndraono Gizera'eli nifa'ema Yosua, wa fefu hadia zi no ifabu'u Lowalangi ba ndraono Gizera'eli i'otarai Gaberahamo, Iza'aki, Yakobo ba ha sambalö wa ahori itörö.
Ya'ita irugi ba ngaluo Andre ma'ökhö, he wa'ae tenga nga'ötö Gaberahamo Ita molo'ö silsilah, hiza i ya'ita andre no tobali nga'ötö Gaberahamo dali wamati. Börö daö, da tafaduhusi tödö wa hadia ia howu-howu si no ifabu'u Lowalangi khö Gaberahamo, ha sambalö göi wa i'amualagö khöda Lowalangi asala so khöda wamati ba fanötöna khö-Nia.
Angerönua ba Fondruhö!
Ama/Ina ba talifusö Fefu ni'omasi'ö ba döi Zo'aya, si tobali angerönua khöda moroi ba Daromali Lowalangi nifa'ema khöda ba ngaluo andre ma'ökhö, yaia daö:
1. Böi ta aombösi tödö Lowalangi ba wa'aurida ba guli danö andre. Awöda niha, tola manö Falimo, hiza i Lowalangi lö irai olifu ia hadia zi no amabu'ula li-Nia. (Jangan meragukan Tuhan dalam hidup ini. Manusia bisa ingkar janji, tetapi Allah tidak pernah berdusta. Jika ia sudah berfirman, ia pasti menggenapinya).
2. Ba wombase'ö inötö nihonogöi Lowalangi ba wangamualagö amabu'ula Li-Nia ba zamati, ba moguna mu'okhögö dödö si sökhi, si lö faröi khö Lowalangi (Setia dalam proses Tuhan, seperti bangsa Israel yang dituntut harus melangkah dan taat berjalan bersama Tuhan sebelum melihat janji itu menjadi kenyataan. Kiranya begitu juga dengan kita, tetaplah taat dan setia di tengah proses penantian).
3. Na no tatema'ö mbuala Lowalangi si no ifabu'u khöda, ba böi olifu Ita ba wangandrö saohagölö (Ketika kita sudah menerima berkat Tuhan dalam hidup kita, janganlah kita lupa untuk tetap mengucap syukur).
Simanö Daromali Lowalangi sinangea tobali angerönua khöda ba ngaluo Andre ma'ökhö, ya'itolo Ita Lowalangi.