Famobörö
Ba guli danö andre, lö hadöi niwöwöi Lowalangi si lö Ifahowu’ö! I’otarai mböröta irugi iada’a Ifahowu’ö Lowalangi fefu niwöwöi-Nia, töratöra niha si no khilikhili-Nia (1 Mz. 1:22, 28; 5:2; 9:1; 12:2-3; 18:18; 22:18; 28:14). Howuhowu-Nia wa tola auri ita, ba howuhowu-Nia göi zanga’asogö fangorifi ba zi no ifazökhi ma’afefu. Howuhowunia andre zamaduhu’ö khöda wa lö tebulö manötöna ita khöNia, somböi ba sangorifi ya’ita. Ba zamati khö-Nia, so gamaehuta howuhowu nifa’ema-Nia. Ba 4 Moze andre, ifaehagö da’ö Lowalangi.
Famotokhi
Ba wamahowu’ö Lowalangi samati khö-Nia, molo’ö nisura Moze andre, anehe ita zi 3 (tölu) faosatö sanandrösa ba howuhowu-Nia. Si föföna, No ihonogöi ndra enoni-Nia ba wama’ema howuhowu ba zamati (22-23). Humede Yehowa khö Moze ena’ö ifa’ema khö ndra A’aroni ba iraononia hewisa nifaluara ba wamahowu’ö Iraono Gizeraeli. Taroma li soroi Lowalangi andre, ifanandrösa ba khö ndra ere sohalöŵö ba nose wama’ele’ö khö-Nia. Ira ere zi tobali tohutohu ma salahi (wakil) Yehowa ba wamaehagö howuhowu khö Ndraono Gizeraeli. No mube’e ba danga ndra ere wangai halöŵö ni’amoni’ö andrö ba he göi ba wamahowu’ö banua Zo’aya ba döi Lowalangi. Da’ö halöŵö si tebai ifalua niha si lö mutuyu tobali enoni Lowalangi (3 Mz. 9:22). Ira ere zama’ema töi Lowalangi andrö ba niha samati.
Ena’ö göi aboto ba dödöda wa satuada ma awöda samati tola ifahowu’ö ita. Hiza, famahowu’ö da’ö ha fangandrö khö Zo’aya. Si mane Iza’aki me ifahowu’ö Yakobo, ba no sangandrö ia khö Yehowa ba da’ö ena’ö ifahowu’ö nononia andrö si sökhi amuata ba somasi ia. Ira ere lafa’ema döi Yehowa ba zamati, na ira samati la’angaröfi li döi Yehowa.
Si dua, Howuhowu ni’amualagö Lowalangi ba zamati. Howuhowu sedöna ibe’e ba mbanua-Nia So’aya, so tölu ngawalö. 1) Fondrorogö-Nia (24). Howuhowu Lowalangi ba wondrorogö banua-Nia ba no Ifotandra da’ö i‘otarai awu’a ira ba danö Miserayi irugi dania danö Gana’ana. Ifoboto howuhowu-Nia andrö Yehowa, ba wondrorogö ya’ira ba döröŵara ba danö si mate, lö ambö khöra hadia ia; lö sadudu nukhara ba lö sabao gahera (Neh. 9:21; 5 Mz. 2:7). Lö si te’ala ira ba wasuwöta, ahori te’ala fefu nudura ibe’e So’aya. No i‘agö fönara Yehowa, ba wasöndrata salahira. Ba wondrorogö-Nia ya’ira, ba lö sa’ae falukha ira wa’ate’ala ba nudu, lö ambö ira soguna bongi ma’ökhö, ba lö göi tebulö i‘ölini ira Yehowa ba döröŵara (Sin. 121:7). 2) Fa’ebua dödö (25). So dombua geluaha haga mbawa Yehowa nisura ba Zura Ni’amoni’ö: fa’ebua dödö safönu fa’omasi ba fa’auri ba fa’asökhi (5 Mz. 30:30; Sin. 27:1; 43:3; 44:4) ba holahola galitö fönu Lowalangi ba zanandraŵa (3 Mz. 10:2; 4 Mz. 17:10; Sin. 34:16). Ba wamohaga mbawa-Nia khöda, ba iforoma’ö Lowalangi wa edöna Ia khöda ba ihöröhörögö ita bongi ma’ökhö (Sin. 34:17; 121:4). Lö si lö anehe Ia ba nifaluada he göi ba zalua khöda. Ahori I’osisi’ö fefu da’ö ba itolo ita lö mamalö. 3) Fa’ohahau dödö (26). Fefu ngawalö zi sökhi ba ibe’e ba niha samati. Fa’ohahau dödö tenga börö me lö noro dödöda si mane fökhö ma fa’amate. Fa’ohahau dödö si ndruhundruhu no si’otarai Lowalangi, I’asogö bakha ba dödöda. Ohahau dödöda börö me ta’ila wa so Lowalangi khöda, faofao ia khöda, ba lö tebulö ibokai lala ba noro dödöda ma’afefu töratöra ba wangorifi ya’ita tana khöNia.
Si tölu, Fangaro howuhowu Lowalangi nifa’ema ndra enoni ba zamati ya’ia döi-Nia. Ba wangandrö howuhowu andre 3 (tölu) kali latötöi döi Yehowa. Töi Yehowa (YHWH) ya’ia da’ö töi si lö möi nibaso me lö hurufo sauri ba wanura ya’ia (tidak ada huruf vocal). YHWH ya’ia döi Lowalangi si ndruhu. I’otöi da’ö Ama, he göi Yesu (Ono Lowalangi), ba Eheha Ni’amoni’ö. Tölu (3) kali latötöi ba wamahowu’ö samati börö me Lowalangida sambua tölu: Ama (Sin. 110:1), Ono (Rm. 10:90 ba Eheha Ni’amoni’ö (2 Kor. 3:17). Da’ö göi ni’oguna’ö ndra sinenge Yesu, si mane nisura Waulo ba 2 Korindro 13:13. Töi Yehowa zanga’aro’ö howuhowu-Nia börö me töi-Nia andrö ba no Ya’ia.
Amarahuta
Howuhowu fondrege zebua ni’amualagö Lowalangi khöda ya’ia da’ö fa’auri si lö aetu ba khö Yesu Keriso. Heŵa’ae ahori ibönökhi zoguna khöda bongi ma’ökhö, ma zui fasui ita nga’ötöda, ba teturia sibai döida ba guli danö andre, ba yaŵa da’ö fefu ba I’amualagö göi khöda wa’auri si lö aetu, si tebai ta’okhögö na tenga fa’ahakhö dödö Lowalangi.
Ifa’ema göi khöda Lowalangi wa tenga börö ndra enoni wa tefahowu’ö ita, ma zui börö wamatida. Howuhowu Lowalangi ba ifa’ema ba zedöna dödö-Nia. Lö I’ondraligö wamati, buabua ma farangeda. Ifa’ema howuhowu-Nia molo’ö fa’ahakhö dödö-Nia. Ya ifahowu’ö ita Lowalangi. Soli Deo Gloria! [Pdt. Mey Daman Lawolo]