A. Famȏrȏgȏ
Ato zangila si sȏkhi, ba asese ambȏ wamalua si sȏkhi. Ha omasi falukha wa’ohahau dȏdȏ, ba lȏ omasi ifalua wa’omasi ba nawȏ. I’ila wa barȏ wangarȏ-ngarȏ so nawȏnia, ba tenga itolo, ihȏtȏi ifanini dȏdȏ, ifa’ele’ö fȏna nawȏnia wa’abȏlȏnia, si sokhȏnia, awȏ wa’atuatuania. Niha samalua da’ö hulȏ zangila amakhoita nibasoda ba zura Luka 10:25-37.
B. Fangosisi’ȏ
So sambua Gamaedola, “I’o si lö mangila, ba si ndruhunia, i‘ila” (Berlagak tidak tahu padahal sebenarnya tahu). Hulȏ si manȏ zangila amakhoita ba Luka 10:25-37. Ifaedogö ia hulȏ zi lȏ tȏdȏ. Manofu Ia khȏ Yesu, hewisa wogamȏ banua wa’ohahau dödö? Hiza, me no ibe’e wa’aboto ba dödö khȏnia Yesu, ba ifuli manofu ia, imane “Ha niha nawögu niha?” Sageu niha fȏnania, niha sabu tȏdȏ, ba iŵa’ȏ ha niha nawȏgu niha. Hadia mbȏrȏ wa lȏ i’ila nawȏnia niha? Bȏrȏ mbaru gere sebua nifakenia: ha i’ila wangomasi’ȏ Lowalangi ba lȏ i‘omasi’ȏ nawȏnia niha. Da’a lafotȏi fa’omasi falimosa. Ba niha samalua da’e ba lö falukha wa’ohahau dȏdȏ/banua zorugo, bȏrȏ me ha mamati mboto ba lȏ mamati tȏdȏ.
Bȏrȏ da’ȏ, ba zura Luka 10:25-37 andre, Iŵa’ȏ Yesu, na omasi falukha mbanua zorugo, ba bȏi ha mamati mboto, moguna mamati dȏdȏ. Bȏi ha mu’ila muŵa’ȏ, ba abua wamalua. Somasi Yesu, bȏi so wamati sebua bo, famati sihokha bo, owȏlȏ’ȏlȏ wamu’a taromali, wangondrasi nahia wanuno Lowalangi, ba fo’amuata no aröu fabȏ’ȏ. Ba zura andre, so gohitȏ dȏdȏ Yesus khȏ zangila amakhoita andre:
1. Famatida tenga ha ba wa’atuatua, ifaduhu’ö ba mbuabua (ayati 25 – 28).
Sangila amakhoita, oi i’ila nȏsi zura. Heŵa’ae no i’ila, ba i’o si lȏ mangila, ba wanandraigȏ Yesu, ba baero da’ȏ ba wangai tȏi, ena’ȏ iŵa’ȏ Yesu “onekhe”. Me no idunȏdunȏ nȏsi zura, ba imane khönia Yesu, ena’ȏ ifalua da’ȏ. Lö isuno ia Yesu, ifarou ia Yesu ena’ȏ bȏi ha onekhe, ba atuatua göi wamalua ȏsi zura (taroma li). Eluahania, oroma na no atuatua ba daromali andrȏ ba wangomasi’ȏ Lowalangi ba ba fangomasi’ȏ awȏ.
2. Fa’omasida mufaluagö ba niha fefu (ayati 29-36).
Ibe’e gamaedola Yesus Keriso khȏ zangila amakhoita yai da’ȏ Niha Samaria. Ba ayati 30-36 andre idunȏdunȏ khȏda taromali wa Niha Samaria, i’oroma’ȏ wa’omasinia. Haŵa’ae, na dali wa banuasa ma bosinia, ba no ni’ogorofi ndra niha Yehuda sibai ira. Ba hiza, so gȏi khȏra wa’aboto badȏdȏ wangomasi’ȏ awȏ ba fangomasi’ȏ Lowalangi.
3. Mu’o’ȏ Daromali Lowalangi (ayati 37).
Iŵa’ȏ Yesu “Lau zi manȏ”, eluahania na no mu’ila zi sȏkhi, moguna wamalua. Bȏi mu’o’ȏ gamaedola: Hulo “wȏnu/bo’ole si so bakha ba nowo, hulȏ zi lö i’ila” (Kura – kura dalam perahu, pura pura tidak tahu). Ebua hukuma niha sangila ba si lȏ mamalua moroi ba niha si no mamalua heŵa’ae lö i‘ila. Omasi sa mȏi ba zorugo, ba lȏ folo’ȏ taroma li.
C. Famatȏfa
Ba ginȏtȏ si so ya’ita andre, asese gȏi tesȏndra wo’amuata zangila amakhiota andrȏ ba wa’auri niha samati. Omasi mȏi ba zorugo, ba lȏ fangomasi’ȏ Lowalangi ba nawȏ. Hewisa ena’ȏ falukha ita wa’auri si lȏ aetu. Ba daroma li nibosada ifaha’ȏ ita:
1. Sökhi wamalua moroi ba wa’onekhe ba ba wa’atuatua
Ama/ina ba talifusȏ: Moguna sa wangi’ila si sȏkhi, hiza’i abölö moguna moroi ba dȏ’ö wamalua ya’ia. Ba na so zangila molau si sȏkhi, ba na lȏ ifalua, ba horȏ da’ȏ khȏnia (Yakobo 4:17). Sangila amakhoita idunödunö wangi’ilania si sȏkhi, ba hiza ifarou ia Yesu wamalua. Famalua si sȏkhi, no amaedola zananȏ sinanȏ: tumbu, ba samuza inȏtȏ, ba mubasi mbuania na baga wondrorogȏ.
Ama/ina ba talifusȏ, me no sȏkhi wolau si sȏkhi moroi ba wangi’ila si sȏkhi, data’o’amuatagȏ wamalua si sȏkhi andrȏ ba wanolo awȏ si fao famati, tenga si fao fayaŵasa, ma wangalui tȏi, bȏrȏ toba’a niha si manö ba wogamȏ banua zorugo. Tatȏngȏni wa famati si lȏ buabua, no amaedola zi lȏ noso (Yakobo 2:17). Famalua wa’omasi ba nawȏ, tafodane-dane ia ba wangomasi’ȏ Lowalangi. Ena’ȏ bȏi afatȏ dȏdȏda na lȏ isulöni khöda. Andrȏ bȏi atege ita wamalua si sȏkhi ba niha, bȏrȏ me so ginȏtȏ wamasi dania (baso Galatia 6:9-1).
2. Tafalua zi sȏkhi ba nawȏ hulȏ na khȏ Zo’aya
Ama/ina ba talifusȏ, tafalua zi sȏkhi ba nawȏ hulȏ na khö Zo’aya. No ifaha’ȏ zangila amakhoita andrö Yesu, ena’ö bȏi ha fangomasi’ȏ Lowalangi, moguna gȏi wangomasi’ȏ awȏ. Iŵa’ȏ ba zura 1 Yohane 4:20, Na so zanguma’ȏ: Omasido Lowalangi, ba na fatiu dȏdȏnia ba dalifusȏnia, ba so faya ia; si lȏ mangomasi’ȏ talifusȏnia sa, ni’ila hȏrȏnia, ba tebai omasi ia Lowalangi, si lȏ i’ila hȏrȏnia. Böi omuso dȏdȏ na ahele gahe nawȏda, ba abu dȏdȏda na omuso dȏdȏ nawȏda, da’ȏ sa’ae fo’amuata si lȏ mangomasi’ȏ Lowalangi. Na so khida da’ȏ sökhi tafalalini gera’erada.
3. Ta’aurifagȏ daromali Lowalangi.
Niha samalua fa’omasi ba nawö, no sangomasi’ȏ Lowalangi iŵa’ȏ Yesu ba solo’ȏ oroisa (taroma li). Ba zura Mataio 25:40 iŵa’ö Yesu “Ba itema dania lira Razo andrȏ, imane khȏra: si ndruhu niŵa’ȏgu khȏmi, ndrege nilaumi ba dalaifusȏgu andrȏ fondrege zi lumana, ha niha ia ba khȏgu no milau da’ȏ. Si manȏ gȏi Waulo iŵa’ȏ ba mbanua Roma wa sangomasi’ȏ awȏnia sa ba no i’o’ȏ goroisa (Roma 13:8b). Ama/ina ba talifusȏ, bȏi ha tȏi wa Niha Keriso ita, ta’ila ba lȏ ta’aurifagȏ daroma li Lowalangi.
D. Fondruhȏ
Hadia, no aboto ba dȏdȏda wa ebua wamalua fa’omasi moroi ba wa’atuatua? Na no aboto ba dȏdȏda, hadia no tafalua wa’omasi ba nawȏ nifodanedane ba wangomasi’ȏ Lowalangi? Sinanȏ ba dȏdȏ: Ba itema linia imane: Omasi’ȏ Zo’aya Lowalangiu moroi si’aikȏ ba dȏdȏu, nosou ma’asambua, zangomasi’ȏ ya’ia, ba ȏhorigȏ wa’abȏlȏu awȏ gera’erau wangomasi’ȏ ya’ia, ba omasi’ȏ zahatȏ khȏu si mane fa’omasiu ndra’ugȏ (Luka 10:27).