Famobörö
Hadia no irai ö'ila zogale gö (forokata) ba mbanua sebua? Ba da'ö ta'ila ato zowöli, lataögö ara musindro ba wombalobaloi gö andrö. Hana wa lalau si manö? Börö me no larongo ba niha ba tehöngö teturia wa ö ba forokata andrö ami sibai.
Si manö göi mbanua Zo'aya ba zi mane inötö. Ikaoni ita So'aya tenga ha afu ya'ita samösa zanema'ö buala-Nia andrö. Hiza'i ena'ö ba wa'aurida andre tobali howuhowu ba niha ma'afefu. Na fa'omasi, fanolo, farange si sökhi zi fatewu khöda, ba lamane tödöra niha, "Omasi-Do u'o'ö Lowalangi nisunou."
Da'a gõi nifa'ema Zama'ele'ö Zakharia ba faza 8 andre. Me no mangawuli Ndraono Gizera'eli moroi ba Mbabeli, si mane nifabu'u Yehowa, ha sambalö Ibohouni ba mangawuli Ndraono Gizera'eli ba Yerusalema. Fangawulira börö me so zi tobali amakhoita Lowalangi khöra ya’ia ba wamazökhi osali Yehowa ba Yeruzalema. Si ndruhunia, mo’amböta khöra zoguna. Andrö ifarou dödöra So’aya ba wangombakha Zakharia andre, wa lö tebulö ifahowu’ö ira Lowalangi, tobali soi sanuriagö fangorifi ba niha fefu dania ira. Hewisa wa tola tefa’ema wangorifi andrö ba niha fefu?
Famotokhi
Si föföna, Ikaoni Yehowa fefu soi mangalulu khõ-Nia (ayati 20-21). Ba ayati da'a aboto sibai ba dödöda wa fangorifi andrö mu'amualagö tenga ha ba zi sambua mado, furugö ma soi. Hiza'i tefa'ema ba niha (soi) ma'afefu.
Tödö Yehowa, wa fangorifi andrö mufa'ema ba niha sanuno Ya'ia. Börö da'ö, böi so khöda dödö wanguma'ö fangorifi andrö ha mu'amualagö khöda samösa. Dozi saboto ba dödö, sangalulu ba solo'ö Yesu Keriso ba falukha wangorifi.
Si dua, Tekaoni zamati tobali samaduhu'ö afu tedönia’ö dödö zato khö Zo'aya (ayati 22). Imane ba ayati da'e: Oya soi, ato niha baero zangondrasi ba wangalui Yehowa ngahönö... Hana wa tohare ira? Aboto ba dödö fefu soi wa fa'omasi Yehowa si ndruhundruhu alua ba mbanua-Nia.
Fa'omasi Yehowa andre oroma ia ba lala wa'auri sero ma'ökhö nifalua zamati.
Na la'ila ita :
- ba wongambatö falukha wa'ohahau dödö
- lö falimosa
- owölö'ölö ba gorahua zamati
- i'efa'ö zala nawönia
- so wa'omasi
- lö mamadaö
- sökhi warange,
- lö fa'afökhö dödö, btn
Ba wo'amuata si sökhi andre, tola manö manofu niha, ba lamane: hana faehu sibai wa'aurinia? Ha'ökhö mamati ia?
Si tölu, Tefahowu'ö afu tobali howuhowu (ayati 23). Ba ayati si 23 andre, ba da'e aboto ba dödöda wa fefu soi andrö la'alui Yehowa. Eluahania wa alua da'e tenga börö ita, no börö Yehowa. Andrö wa tekaoni ita afu tobali ita haga, asio ba tobali samuduhu'ö Keriso. Na so Yehowa ba wa'aurida, ba la'ila niha sato wa'omasi-Nia andrõ ba khöda.
Amarahuta
Ba zura Zakharia faza 8:20-23 andre tefahaö ita wa fangorifi andrö ba niha ma'afefu. Moguna manofu ita zamösana, hadia no tobali ita haga ba zi fasui ita?