FA’ABÖLÖ LOWALANGI BA WONDROROGÖ BANUA-NIA (2 Moze 14:19-31)

Famobörö
Fa’awu’a Ndraono Gizeraeli ba danö Miserayi, no so dabitabi me larugi zinga nasi soyo. Fönara no tebologö nasi sebolo, si tebai mu’olangisi. Furira göi, ba so razo Miserayi ba 600 gureta ba wanuwö awö niha sanuwö si fao khönia ba wolohi Iraono Gizeraeli (14:7). Me la’ila da’ö nga’ötö Yakobo andrö, ba ata’u sibai ira, la’angaröfi li Yehowa, ba fatahitahi ira khö Moze, solohe ya’ira ba danö Gana’ana. Hiza, i‘abe’e’ö dödöra Moze, me “Yehowa zi fasöndra salahimi, ba sahono ami” (14). Ba wa’atosasara andrö, ifa’ele’ö khöra Yehowa Lowalangi hewisa wa’abölö-Nia ba wondrorogö tana khö-Nia.
Famotokhi
Si föföna, Lö iböhöi ita Lowalangi sondrorogö ya’ita ba lala döröŵada (19-20). Ba wekökökökö Ndraono Gizeraeli andrö, muhede Yehowa khö Moze, ena’ö ifazaŵa zi’onia yaŵa nasi ba faefa dania idanö andrö (16). Ba ba da’ö göi, Mala’ika Yehowa andrö awö mboto lawuo si faofao khöra si so fönara, möi furira, ba gotaluara Dawa Miserayi. Mala’ika Yehowa andrö ba no Yesu Keriso, si lö faröi khöra. Ba gamabu’ula li si bohou lafotöi ia Emanu’eli, awöda Lowalangi (Mat. 1:23). Bakha ba mboto lawuo göi andrö, so Yehowa, samaigimaigi Iraono Gizeraeli awö zi fasui ya’ira (24). Me no so furira Mala’ika Yehowa ba boto lawuo andrö, ba da’ö sa’ae zomba’agö Dawa Miserayi ba wokhamö ya’ira.
Si ndruhunia, lö aboto ba dödö Ndraono Gizeraeli ha niha Mala’ika Yehowa awö mboto lawuo andrö si faofao khöra. Fa’ata’ura zokusi hörö dödöra ba wangi’ila ha niha nawöra ba lala döröŵara. Bongi ma’ökhö so khöra Lowalangi. Mala’ika Yehowa zanuturu khöra lala, ba boto lawuo zohagaini ya’ira. Lö irai iböhöli ira Yehowa ba lalara andrö. Ba da’ö ta’ila wa lö itehe te’ala ita Lowalangi, sondrorogö ya’ita. Börö zi manö, tabokai dödöda ba wamaigi fa’abölö Yehowa andrö si lö mamalömalö faofao khöda bongi ma’ökhö.
Si dua, Ibokai Yehowa lala ba noro dödöda (21-22). Yehowa andrö si ndruhundruhu faofao khöda bongi ma’ökhö. Ba si ndruhunia göi, ba lö irai iröi ita ba döröŵada. Anehe Ia hadia zi tobali fakaosada. Ba lö tebulö ituturu khöda lala ba noro dödöda. Si mane ba Ndraono Gizeraeli andre, ifarou Moze ena’ö ifazaŵa zi’onia yaŵa nasi, ba Ifatörö nangi sabölö si’otarai gatumbukha luo, ifabali idanö andrö. Mowaöwaö Ndraono Gizera’eli ba dalu nasi andrö, latarai danö sabe’e. Idanö ba ngaira tobali hulö mbagolö. Hiza, Fara’o awö zi fao khönia, ba lagohi ira. Ba me i‘ila da’ö Yehowa si so ba lawuo andrö, ba ifakuyu ira, irege adeha gaologaolo guretara ba tosasa dödöra ba wogamö Iraono Gizera’eli. Si ndruhu wa Yehowa zi fasöndra salahira. Telömö fefu zolohi ya’ira ba nasi andrö.
Ya’ia zamokai lala ba wa’abu dödö. Lö si tebai khö Lowalangi. Hadia zi tebai tafalua, ba lö ambö wa’abölö danga Lowalangi ba wamokai lala. Andrö tatou’ö khö-Nia fefu noro dödöda, me no ifarou ita wanguma’ö “Böi mibusi tödö hadia ia, ba gofu hadia ia mbörö, na so zabu dödömi, ba mibokai khö Lowalangi, ba wangandrö ba ba wangalulu, ya fao wangandrö saoha gölö” (Fil. 4:6).
Si tölu, Ifa’ele’ö lakhömi-Nia si tebai musu’a (23-31). Asese manofu zamati, “Hana lö iröi ita fa’afökhö/fanandraigö?” Fefu wakaosada si ndruhunia, ifasao ita ba wanöngöni fa’abölö Lowalangi ba wondrorogö-Nia ya’ita. Tebai latörö nasi zukhu andrö Iraono Gizera’eli. Tebai lalaŵa göi Ndrawa Miserayi andrö, sato sibai. Ha Yehowa zi tola fasöndra salahira. Me aboto ba dödöra da’ö, andrö lö aombö ira wanuno Lowalangi. Anehe ira lakhömi-Nia si tebai musu’a. Fanöröra asi soyo andrö tobali tandra sahölihöli dödö fondrege zebua bakha ba hikaya Ndraono Gizeraeli. Andrö la’ata’ufi Yehowa ba faduhu dödöra khö-Nia wa Ya’ia zondrorogö ya’ira.
Ba wakaosada si lö irai faböhöi khöda, ba no ndrela Lowalangi ba wamahaö ya’ita ena’ö khö-Nia manö manötöna ita. Ha sambalö itolo ita. Börö da’ö, böi mamalö göi ita wanuno Ya’ia, töratöra ena’ö manö faduhu dödöda khö-Nia, sabölö ba solomasi.
Amarahuta
Hikaya Ndraono Gizera’eli ba wanöröra asi soyo andre, ifahaö ita ena’ö lö mamalö ita ba wanötöna khö Yehowa Lowalangi fondrege zabölö ba wondrorogö ya’ita ba lala döröŵada. Bakha ba da’ö göi, moguna tatou’ö ba danga Lowalangi wakaosada. Ya’ia zamokai lala ba sanolo ya’ita. Lö irai iböhöi ita ba lö göi itehe te’ala ita. Ya’ia sa Lowalangida, kubaloda si lö faröiröi khöda. Ya itolo ita Lowalangi.
Soli Deo Gloria